Geo Sky ჩინეთიდან ევროპის მიმართულებით რეგულარულ სატვირთო რეისებს განახორციელებს
ქართული ავიაკომპანია Geo Sky ჩინეთიდან ევროპის მიმართულებით რეგულარულ სატვირთო რეისებს განახორციელებს.
ავიაკომპანიამ 1 დეკემბრიდან 27 მარტამდე, რეგულარული სატვირთო რეისების განხორციელების უფლება უკვე მოიპოვა.
ავიაგადამზიდველის მიერ, რეისები თბილისი-ჩენჩჟოუ-თბილისისა და თბილისი-ფრანკფურტი-თბილისის საჰაერო ხაზებზე Boeing B747-200-ის ტიპის საჰაერო ხომალდებით, კვირაში 3 სიხშირით შესრულდება.
ავიაკომპანია Geo Sky პირველი ქართველი გადამზიდველია, რომელიც რეგულარულ სატვირთო ფრენებს შეასრულებს.
ამასთან აღსანიშნავია, რომ ჩინეთიდან ევროპის მიმართულებით რეგულარული სატვირთო ფრენები დღემდე არც ერთ ქართულ ავიაკომპანიას არ განუხორციელებია. დღეისათვის ავიაკომპანია ხსენებულ საჰაერო ხაზებზე ჩარტერულ საჰაერო მიმოსვლას ახორციელებს.
Geo Sky-ზე ექსპლუატანტის სერტიფიკატი სამოქალაქო ავიაციის სააგენტომ 2017 წელს გასცა. 2018 წელს, ავიაკომპანიამ წარმატებით გაიარა არაევროკავშირის წევრი ქვეყნების ავიაკომპანიების ავტორიზაციის პროცესი (EU safety authorization for foreign air operators – PART-TCO).
კარგო გადამზიდველის ფლოტი ამჟამად ორი Boeing B747 ტიპის საჰაერო ხომალდისაგან შედგება. Geo Sky ქართული საფრენოსნო და საინჟინრო-ტექნიკური პერსონალით არის დაკომპლექტებული.
