Ge Investment Corp-ი საქართველოში თხილისა და ნუშის გადამამუშავებელ საწარმოებს გახსნის

Ge Investment Corp-ი საქართველოში ორ ახალ საწარმოს ხსნის. საწარმოები თხილისა და ნუშის გადამამუშავების მიმართულებით იმუშავებენ.

როგორც „ბიზნესპარტნიორს“ Ge Investment Corp-ის დირექტორმა თორნიკე ლათათიამ განუცხადა, მომავალი წლიდან კომპანია ნუშის აგრესიულ ექსპორტს დაიწყებს. ექსპორტი დიდ ბრიტანეთისა და გერმანიაში განხორციელდება. კომპანიას შესაბამისი კონტრაქტები უკვე გაფორმებული აქვს.

„ამ ქვეყნებში შეიმჩნევა პროდუქციის მაღალი მოხმარების ტენდენცია და ჩვენი დაკვირვებით ეს არის ბაზარები, სადაც შეიძლება პროდუქცია გაიყიდოს მაღალ ფასად, თუ მათ მოთხოვნებს ხარისხთან დაკავშირებით დავაკმაყოფილებთ, რისი ძალიან დიდი იმედიც გვაქვს“ - აცხადებს თორნიკე ლათათია.

Ge Investment Corp-ი ამერიკული კომპანიის ფილიალია, რომელიც საქართველოში ორი კომპანიით ოპერირებს - „ჯი ინვესტმენტი“ გადამუშავების, ხოლო Nuts Incorporated- პირველადი წარმოების - ნუშისა და თხილის ბაღების სეგმენტში მუშაობს.

კომპანია 2500 ჰექტრამდე თხილისა და ნუშის ბაღებს ფლობს საქართველოში. ბოლო სამი წლის განმავლობაში ჯგუფმა ქვეყანაში 30 მლნ დოლარის ინვესტიცია განახორციელა.