გალერია თბილისი: დილიდან ჩვეულ რეჟიმში ვმუშაობთ, ობიექტს არ ჰქონია ზარალი
"გალერია თბილისი" დღეიდან უკვე ჩვეულ რეჟიმში (10:00-22:00 საათებში) აგრძელებს მუშაობას. როგორც "ბიზნესპარტნიორს" კომპანიის კომუნიკაციების სამსახურის ხელმძღვანელმა ნინო ადუაშვილმა განუცხადა, არ დამწვარა არცერთი ობიექტი.
კითხვაზე,მიადგა თუ არა სავაჭრო ცენტრს ზარალი,რა ოდენობით და იყო თუ არა დაზღვეული, ადუაშვილი განმარტავს, რომ ობიექტს არ ჰქონია ზარალი, დაზიანდა მხოლოდ ელექტრო ფარი.
"სავაჭრო ცენტრის მესამე სართულზე ერთ-ერთ ობიექტზე ცეცხლი დენის სადენებს გაუჩნდა. მოხდა დაკვამლიანება, რის გამოც ჩაირთო ავტომატური ევაკუაცია, შენობა ძალიან მალე სრულად ევაკუირებული იყო და სიტუაციაც სრულად ექვემდებარებოდა კონტროლს. თითოეულმა მომხმარებელმა უსაფრთხოდ დატოვა შენობა. გამომდინარე იქიდან, რომ შენობაში შეინიშნებოდა მცირედი კვამლის სუნი მომხმარებლები გუშინ აღარ დაგვიშვია სავაჭრო ცენტრში,"-აცხადებს ადუაშვილი.
შეგახსენებთ, გუშინ "გალერია თბილისის" ერთ-ერთ ობიექტზე ცეცხლი გაჩნდა, რის გამოც ევაკუაცია გამოცხადდა.
