Chronos-ი საერთაშორისო ბაზრებზე ფეხის მოკიდებას ონლაინ გაყიდვებით შეეცდება
ოქროსა და ვერცხლის სამკაულების ქართული ბრენდი Chronos-ი პანდემიის გამო საერთაშორისო ბაზარზე გასვლის გზებს ცვლის.
კომპანია ონლაინ გაყიდვებზე გადაერთო და ევროპისა და ამერიკის ბაზარზე ფეხის მოკიდებას ელექტრონული კომერციით შეეცდება. მოლაპარაკებები სხვადასხვა საერთაშორისო პლატფორმასთან უკვე მიმდინარეობს.
პანდემიამდე საწარმოს გეგმაში იყო რამდენიმე ქვეყანაში შოურუმის გახსნა, თუმცა არსებულმა ვითარებამ პროცესი შეაფერხა.
"არსებული რეალობის გათვალისიწნებით ბიზნესის განვითარება სხვა რელსებზე გადავაწყვეთ, მთლიანად მოვერგეთ ონლაინ სივრცეს. ამ პირობებში რთულია კონკრეტული გეგმების გაჟღერება რამდენადაც 2021 წელიც არაპროგნოზირებადია, თუმცა ვგეგმავთ ფიზიკური მაღაზიების გახსნას როგორც საქართველოში, ასევე საზღვრებს გარეთ, თუმცა ამ ეტაპზე სრულად ორიენტირებული ვართ ონლაინ გაყიდვებზე", - ამბობს კომპანიის დამფუძნებელი მაკა შავგულიძე.
Chronos-ი ბაზარზე ერთი წლის წინ, 100 000 ლარამდე ინვესტიციით შემოვიდა და 20-მდე ადამიანს ასაქმებს. ბრენდი სამკაულებს ქართული ოქროს საგანძურის მიხედვით ამზადებს, რომელიც სამი ათასწლეულის ისტორიას მოიცავს და საქართველოს მუზეუმებშია დაცული.
