"ჩირინა“ 2021 წლის შემოდგომაზე სოსისის და ძეხვის წარმოებას გეგმავს
კომპანია „ჩირინა“ 2021 წლის შემოდგომაზე სოსისის და ძეხვის წარმოებას გეგმავს. როგორც „ბიზნესპარტნიორს“ კომპანიის დამფუძნებელმა რევაზ ვაშაკიძემ განუცხადა, პროდუქცია ძირითადად, ქათმის ხორცისგან დამზადდება.
როგორც ვაშაკიძე აცხადებს, ახალი პროექტისთვის სართიჭალაში დამატებით ახალი ქარხანა აშენდება. ბიზნესმენი განმარტავს, რომ ტერიტორია უკვე კომპანიის საკუთრებაშია. ამჟამად კალკულაციის პროცესი მიმდინარეობს.
შპს „ჩირინა” 2011 წელს ბიზნესმენმა რევაზ ვაშაკიძემ დაარსა. დღეისათვის ის ყველაზე დიდი, ვერტიკალურად ინტეგრირებული მეფრინველოების ფერმაა საქართველოში. აღმოსავლეთ საქართველოში მდებარე კომპლექსი აერთიანებს ინკუბატორს, საკვებ ქარხანას, წყალგამწმენდ სადგურს, ასევე მიწებს, სადაც სიმინდი და ხორბალი მოყავთ. პროდუქტის ხარისხისა და უსაფრთხოების უზრუნველყოფად ფუნქციონირებს მარცვლეულის საშრობი და შესანახი სათავსოები.
