ბიზნესის ნაწილი დისტანციურად დასაქმებულებისთვის ერთიანი საგადასახადო პრაქტიკის დანერგვას ითხოვს
„საქართველოში დისტანციურად მომუშავე პირებისთვის ერთიანი საგადასახადო პრაქტიკა არ არსებობს - ამის შესახებ „გრანთ თორნთონის“ მმართველმა პარტნიორმა პაატა შურღაიამ ჟურნალისტებთან საუბრისას განაცხადა.
მისი განმარტებით, ტექნოლოგიების განვითარებასა და დისტანციურად დასაქმებულთა რაოდენობის ზრდასთან ერთად კანონმდებლობაში არაფერი შეცვლილა.
„არის სხვადასხვა ქეისები: როდესაც ქართული კომპანია ქირაობს ისეთ ადამიანს, რომელიც საქართველოში არ იმყოფება და ჩვენ გვაინტერესებს , როგორია მათი დაბეგვრის პრაქტიკა, ასევე როცა საქართველოში მცხოვრებს ქირაობს უცხოური კომპანია და ეს ადამიანი აღნიშნულ კომპანიას დისტანციურად ემსახურება, ვინ უნდა გადაიხადოს გადასახადი, ფიზიკურმა პირმა თუ თავად კომპანიამ. ჩვენი მიზანია, არა ის რომ მოვითხოვოთ გადასახადის გადახდა, არამედ ის რომ იყოს ერთიანი პრაქტიკა კანონმდებლობაში და დისტანციურად დასაქმებულთა შრომითი ხელშეკრულებები მოექცეს საერთაშორისო დაბეგვრის რეგულირებაში.“-განმარტა პაატა შურღაიამ.
მისივე თქმით, დღეს დისტანციურად დასაქმებულთა ნაწილი, საშემოსავლო გადასახადით იბეგრება, ნაწილი კი ამ გადასახადს არ იხდის.
„ამ კუთხით საერთაშორისო პრაქტიკაც არის არაერთგვაროვანი, იქიდან გამომდინარე რომ ტექნოლოგიების სწრაფ განვითარებას მთავრობები ხშირად ვერ ეწევიან.“- განმარტა „გრანთ თორნთონის“ მმართველმა პარტნიორმა.
