ბიოდეგრადირებადი პარკების კომპანია "ეკო ჯორჯია" წარმოებას აფართოებს

ბიოდეგრადირებადი პარკების საწარმო "ეკო ჯორჯია" წარმოებას აფართოებს და დასაქმებულთა რაოდენობის გაზრდასაც გეგმავს.

კომპანიის დირექტორის გოჩა ყარყარაშვილის თქმით, საწარმოში ამ დროისთვის 25 ადამიანია დასაქმებული, წლის ბოლოსთვის კი რაოდენობა 70-მდე გაიზრდება.

კომპანია „ეკო ჯორჯია“ გორში მდებარეობს და პირველი საწარმოა საქართველოში, რომელიც აწარმოებს ბიოპლასტიკის გრანულებს, მასალას, რომლისგანაც ბიოდეგრადირებადი პარკი მზადდება. პროდუქტი პოლიეთილენის ალტერნატივაა და სრულად შეესაბამება მთავრობის 472-ე დადგენილებას, რომელიც პოლიეთილენის პარკების მოხმარებას, იმპორტს და რეალიზებას არეგულირებს.

კომპანიამ, სახელმწიფო საკუთრებაში არსებული შენობა ქონების ეროვნული სააგენტოსგან, სიმბოლურად 1 ლარად მიიღო და წარმოების 500 ტონამდე გაზრდის ვალდებულება აიღო.

„ეკო ჯორჯიამ“ სახელმწიფო პროგრამის - „აწარმოე საქართველოში“ სესხის თანადაფინანსების კომპონენტით ისარგებლა. საწარმოში განხორციელებული ჯამური ინვესტიციის მოცულობამ 3 მილიონ ლარს გადააჭარბა.