ახალი ლოკაცია თბილისსა და ბათუმში - პანდემიამ Wine Not-ის საინვესტიციო გეგმები დააპაუზა
ღვინის ბარი და მაღაზია Wine Not-ი პანდემიის გამო დაპაუზებულ საინვესტიციო გეგმებზე „ბიზნესპარტნიორთან“ საუბრობს.
როგორც კომპანიის თანადამფუძნებელი და დირექტორი ნინო აბულაძე აცხადებს, კომპანიას დაგეგმილი ჰქონდა გაფართოება, მათ შორის იყო თბილისში რამდენიმე ახალი ლოკაციის გახსნა და რეგიონებში გასვლა.
„არსებული სივრცე მცირეა, განსაკუთრებით სხვადასხვა ივენთების დროს, გაჩნდა გაფართოების იდეა, გაგვეხსნა მეორე ფილიალი იგივე კონცეფციით, რომელსაც ექნება გარე სივრცეც. სამომავლო პერსპექტივაში გვქონდა დიდ ქალაქებში გასვლა, მათ შორის ბათუმში,“ - აცხადებს ნინო აბულაძე.
მისივე ინფორმაციით, კომპანიის გრძელვადიანი გეგმის ნაწილია Wine Not-ის ფილიალის უნგრეთში, კერძოდ კი ბუდაპეშტში გახსნა. აბულაძე აცხადებს, რომ მას შემდეგ, რაც კორონაპანდემია დასრულდება, კომპანია აღნიშნულ საინვესტიციო გეგმებს ეტაპობრივად განახორციელებს.
კითხვაზე, რამდენ ხანში შეძლებს Wine Not-ი დაუბრუნდეს იმ ნიშნულს, რაც პანდემიამე ჰქონდა და როდის დაიწყებს რეინვესტირებას, ნინო აბულაძე აცხადებს, რომ ამისთვის კომპანიას საშუალოდ 1 წელი დასჭირდება.
მისი ინფორმაციით, ღვინის ბარი და მაღაზია Wine Not-ი პანდემიის და შეზღუდვების მიუხედვად მუშაობას აგრძელებს. როგორც აბულაძე განმარტავს, დახურვის გადაწყვეტილება არ განხილულა, რადგან შემდეგ მისი განახლება საკმაოდ რთული იქნება. მისი ინფორმაციით, ამჟამად კომპანიის შემოსავალი გასულ წელთან შედარებით თითქმის განახევრებულია.
კომპანია ჯამში დაახლოებით 60-მდე მცირე, საოჯახო ტიპის მარანთან თანაშრომლობს.
