60-მდე დარგი სახელმწიფოსგან კომბინირებულ დახმარებას მიიღებს

პროგრამა “აწარმოე საქართველოში“ ფარგლებში, 60-მდე დარგი სახელმწიფოსგან კომბინირებულ დახმარებას მიიღებს. საუბარია საექსპორტო და იმპორტის ჩამნაცვლებელი დარგების განვითარებაზე. 

“60-მდე დარგია, სადაც გვაქვს პოტენციალი, უფრო მეტად განვავითაროთ ექსპორტი, რომელიც ჩვენი სავალურო შემოსავალია, ჩვენი ეკონომიკის, ლარის სიძლიერე, ან ადგილობრივ ბაზარზე შევიდეთ კონკურენციაში იმპორტულ ანალოგიურ საქონელთან“,- განაცხადა ეკონომიკის მინისტრმა ნათია თურნავამ. 

რაც შეეხება პროგრამას, მინისტრის განმარტებით, ასეთი დარგები ერთდროულად მიიღებენ სესხის პროცენტის სუბსიდირებას, ბანკებში თანაუზრუნველყოფას და გრანტს, რომელიც აღებული იქნება სესხის 15%-ის ოდენობით, არაუმეტეს 0.5 მლნ ლარის ფარგლებში. 

სახელმწიფო თანაუზრუნველყოფას 3 წლის ნაცვლად, სესხის მთელი ხანგრძლივობის განმავლობაში მოახდენს. 

“ეს არის მნიშვნელოვანი ხელშეწყობა ისეთი დარგებისათვის, როგორიცაა ადგილობრივი საშენი მასალების წარმოება, პლასტმასის, მინის წარმოება, ფარმაცევტული ნაწარმი, მანქანათმშენებლობა, დანადგარები, მანქანების ნაწილები, საფეიქრო მრეწველობა, ტექსტილი და 60-მდე სხვადასხვა დარგი, რომელსაც აქვს ძლიერი პოტენციალი, ადგილობრივი წარმოება განავითაროს“,- აღნიშნა ნათია თურნავამ.