2.2 მლნ-იანი ინვესტიცია გარდაბანში - "ჩემი რანჩო“ წარმადობას აორმაგებს
ბიზნესმენი ვანო იოსელიანი ბოცვრის წარმოებას აფართოებს. „ჩემი რანჩოს“ დამფუძნებელმა გარდაბანში დამატებით ორი ფერმის მშენებლობა უკვე დაასრულა.
პროექტში 2.2 მლნ ლარის ინვესტიცია განხორციელდა, წარმადობა კი ორჯერ გაიზარდა, რაც წელიწადში დაახლოებით 200 ტონა ბოცვრის ხორცის წარმოებას გულისხმობს. ამჟამად ფერმებში ბოცვრების მოშენების პროცესი მიმდინარეობს. ორივე ფერმა გარდაბანში 1 ჰექტარ ტერიტორიაზეა განთავსებული.
როგორც ვანო იოსელიანი აცხადებს, წლის ბოლომდე ადგილობრივ ბაზარზე ბოცვრის ხორცი დაფასოებული სახით გაიყიდება. კომპანია „ჩემი რანჩო“ ბოცვრის გარდა, სხვა შინაური ხორცის წარმოებასაც არ გამორიცხავს.
შეგახსენებთ, ვანო იოსელიანმა სოკოს ბიზნესიდან მებოცვრეობაში 2017 წლის ბოლოს გადაინაცვლა. გარდაბანში, სოფელ გამარჯვებაში არსებული კომპლექსი მოიცავს როგორც ფერმას, გადამამუშავებელ საწარმოს, ისე ლაბორატორიებს და სასაკლაოს.
