10 კვ.მ-ზე დაიშვება 1 მომხმარებელი, იმუშავებს გასახდელები - თბილისი ცენტრალის დირექტორი
თბილისის ცენტრალის დირექტორის ლევან ყარალაშვილის განცხადებით, 1-ელი თებერვლიდან სავაჭრო ცენტრებში 10კვ.მ-ზე დაიშვება 1 მომხმარებელი, ასევე იმუშავებს გასახდელები და შესაძლებელი იქნება პროდუქციის გადაცვლა.
„დღეს პოზიტიური დღე გვქონდა, იმიტომ, რომ დავაზუსტეთ კონკრეტული შეზღუდვები. კერძოდ, კარგი ამბავია ჩვენთვის ის, რომ 10 კვ. მ იქნება ერთი მომხმარებლისთვის სავაჭრო ცენტრში, ისევე, როგორც ეს არის ჰიპერმარკეტებში. მეორე - იმუშავებს გასახდელები, იქნება პროდუქციის გადაცვლის შესაძლებლობა, რაც ასევე მნიშვნელოვანია ჩვენი კლიენტებისთვის.
სამწუხაროდ, ჯერ ვერ განიხილება შაბათ-კვირას მუშაობის საკითხი, მაგრამ ორ კვირაში ამ საკითხს კიდევ დავუბრუნდებით. შეფასდება ეპიდემიოლოგიური ვითარება და გადაწყვტილება ამის მიხედვით იქნება მიღებული. იგივე ეხება საზოგადოებრივი ტრანსპორტის თემას, რაც ასევე მნიშვნელოვან პრობლემად რჩება. ჩვენ ასევე გვაქვს კონკრეტული დროებითი გადაწყვეტილებები, რომელსაც ეკონომიკის სამინისტროსთან ერთად დავამუშავებთ“, - განაცხადა ლევან ყარალაშვილმა.
ინფორმაციისთვის, მთავრობის ადმინისტრაციაში სავაჭრო ქსელების და მაღაზიების მფლობელებთან შეხვედრა გაიმართა.
