1-ელი ნოემბრიდან "ბიოლი" მუშაობის განსხვავებულ რეჟიმზე გადადის

1-ელი ნოემბრიდან ველნეს კურორტი „ბიოლი“ ახალი რეჟიმით იმუშავებს.

როგორც ველნეს კურორტ „ბიოლის“ დამფუძნებელმა თამაზ მჭედლიძემ  „ბიზნესპარტნიორს“ განუცხადა, შესაძლებელი იქნება კურორტის ტერიტორიაზე არსებული კოტეჯების მხოლოდ ერთი თვიდან ერთ წლამდე დაჯავშნა, მოკლევადიანი ვიზიტებს კი  „ბიოლი“ დროებით აღარ მიიღებს.

მისივე ინფორმაციით, ფუნქციონირების განსხვავებულ რეჟიმში გადადის "ბიოლი ჰოლიც", რომელიც საივენთო რეჟიმში, წინასწარი დაკვეთით იმუშავებს.  

თამაზ მჭედლიძე ამის მიზეზად სამედიცინო ველნეს კურორტი „ბიოლის“ მიმდებარე ტერიტორიაზე ინფრასტრუქტურულ განახლებას ასახელებს. დაგეგმილია მიმდებარე ტერიტორიაზე 4 ახალი კოტეჯის დამატება (3 -ტბაზე, 1-კოტეჯების ზონაში), ასევე  60 ნომრიანი, ხის ეკო სასტუმრო. მოეწყობა აუზი თავის საპროცედურო სერვისით, მოწესრიგდება ტერიტორიაზე არსებული ტბა. 

„კურორტზე არსებული შიდა გზების რეაბილიტაციაც გვინდა განვახორციელოთ. გრძელვადიანი იჯარა კი  ნაკლებ მოძრაობებს იწვევს ტერიტორიაზე, check in და  check out-ების რაოდენობა  მკვეთრად მცირდება. შესაბამისად, კოტეჯების გძელვადიანი იჯარა გვაძლევს მოქნილობის საშუალებას მუშაობაში“-აცხადებს თამაზ მჭედლიძე.

შეგახსენებთ, შპს „მედგრუპ ჯორჯიას“ კუთვნილი ველნეს კურორტ ბიოლის კოჯორში 2013 წლიდან ფუნქციონირებს. 

კომპანიის მიზანია საქართველოში ველნეს ინდუსტრიის განვითარება და როგორც პრემიუმ კლასის, სამედიცინო  კურორტის  პოზიციონირება მსოფლიო ბაზარზე.