ვალერი ჩეხერია: სასტუმრო სერვისში მუშაობა პრესტიჟულ საქმიანობად უნდა იქცეს
„რუმსის“ აღმასრულებელი დირექტორი ვალერი ჩეხერია მიიჩნევს, რომ სასტუმრო სერვისში მუშაობა პრესტიჟულ საქმიანობად უნდა იქცეს.
როგორც ვალერი ჩეხერიამ „ბიზნესპარტნიორთან“ საუბრისას განმარტა, ამისთვის მხოლოდ ხელფასების ზრდა საკმარისი არ არის.
„12 წლის წინ, როცა დავიწყეთ, გვიწევდა იმის ახსნა, რომ სასტუმროში მუშაობა საინტერესოა, რადგან დასაქმებულებს ვთავაზობთ გრძელვადიან კონტრაქტებს, დაზღვევას და სხვა ბენეფიტებს. სერვისში მუშაობა პოპულარული უნდა იყოს და იმედი გვაქვს, რომ ამას მივაღწევთ. ხელფასების ზრდის გარდა, დასაქმებულისთვის მნიშვნელოვანია გრაფიკის მორგება, განათლებისა და პროფესიული ზრდის შეთავაზება,“-აღნიშნა ვალერი ჩეხერიამ.
მისივე განმარტებით, „რუმსის“ სასტუმროებში კარიერული წინსვლის არაერთი მაგალითია, რაც ნებისმიერი ადამიანისთვის სტიმული შეიძლება იყოს.
„ყველას უნდა ქონდეს იმის განცდა, რომ როცა დღეს იწყებს ყველაზე დაბალი პოზიციით, ხვალ ექნება იმის გარანტირებული შანსი, რომ რომელიღაც ჩვენს სასტუმროში შესაძლოა, გენერალური დირექტორის პოზიციამდე დაწინაურდეს. ამისი უამრავი მაგალითია ჩვენს თანამშრომლებში.“-აღნიშნა ვალერი ჩეხერიამ.
