ტუროპერატორები და მედიის წარმომადგენლები იმერეთის კულინარიულ პოტენციალს გაეცნენ
საქართველოს ტურიზმის ეროვნული ადმინისტრაციის ორგანიზებით ტურისტული კომპანიებისა და მედიის წარმომადგენლებისთვის იმერეთში გასტროტური მოეწყო.
ტური გერმანიის საერთაშორისო თანამშრომლობის საზოგადოებასთან (GIZ) თანამშრომლობით გაიმართა.
ტურის მონაწილეები ზესტაფონის, ბაღდადის, წყალტუბოს მუნიციპალიტეტისა და ქუთაისში მდებარე ტურისტულად ნაკლებად ცნობილ საოჯახო კვების ობიექტებსა და მარნებს ესტუმრნენ. ტუროპერატორებმა, ფოტოგრაფებმა და ჟურნალისტებმა ვარციხე და საზანო მოინახულეს, ეწვივნენ ოტია იოსელიანის სახლ-მუზეუმს. ტურის ფარგლებში გამართა იმერული კერძების მომზადების მასტერკლასი, ჩურჩხელის ამოვლება, ასევე საოჯახო ღვინისა და ლუდის დეგუსტაცია.
გასტროტურის მიზანია საქართველოს სხვადასხვა რეგიონის კულინარიული შესაძლებლობების პოპულარიზაცია, ცნობადობის გაზრდა და შიდა ტურიზმის სტიმულირება. ტურიზმის ეროვნული ადმინისტრაცია ინფოტურების მოწყობით შიდა და შემომყვანი ტურისტული კომპანიების წარმომადგენლებსა და გიდებს საშუალებას აძლევს საქართველოს სხვადასხვა რეგიონში, ნაკლებად ცნობილი ადგილები და ობიექტები დაათვალიერონ, მოგზაურებისთვის კი ახალი მარშრუტები და ტურისტული პაკეტები შეადგინონ.
