ტურიზმი
19/06/2023
Turebi.ge: დღის განმავლობაში მომხმარებლების მხრიდან ასობით მოთხოვნა შემოდის
ტუროპერატორები საქართველოდან მოგზაურობის მსურველთა რაოდენობის ზრდაზე მიუთითებენ.
როგორც Turebi.ge-ს დამფუძნებელი, ნიკა გოგოლაძე „ბიზნესპარტნიორთან“ განმარტავს, კომპანიაში დღის განმავლობაში მომხმარებლების მხრიდან ასობით მოთხოვნა შედის.
„შეიძლება ითქვას, რომ ზაფხულის სეზონზე იმდენად გაიზარდა მოთხოვნა, ვერ ავუდივართ მომხმარებლების დამუშავებას. თუ ვინმე წინა წელს იყო თურქეთში, ესპანეთში, საფრანგეთში, წელს ახალ მიმართულებებს განიხილავენ. დღის განმავლობაში ასობით მოთხოვნა შემოდის,“-აღნიშნა ნიკა გოგოლაძემ.
მისივე თქმით, საქართველოდან ბიუჯეტური ფრენები ფაქტობრივად აღარ არის.
„იყო პერიოდი, პანდემიამდე, როცა მაგალითად იტალიის მიმართულებით საქართველოდან ფრენა Wizz Air-ით 50 ევროზე ნაკლები ჯდებოდა. ხშირ შემთხვევაში, ფანტასტიური ფასები ფიქსირდებოდა. თუმცა, ახლა სეზონზე იტალიაში მოგზაურობისთვის 3 000 ლარი მაინც უნდა იანგარიშოს ადამიანმა, რომ ერთკვირიანი კარგი დასვენება და სასტუმრო დაგეგმოს. იტალიის სასტუმროებში პიკზეა ფასები. ამ მხრივ ყველაზე ბიუჯეტური რჩება აია ნაპა, კვიპროსი, საბერძნეთის მიმართულებით შედარებით ბიუჯეტურია ეს ორი ლოკაცია,“-აღნიშნა ნიკა გოგოლაძემ.
მისივე თქმით, ტურისტული მიმართულებების არჩევისას მომხმარებელთა მხრიდან დაკვეთა საკმაოდ მრავალფეროვანია.
„გაიშალა ტურისტული მიმართულება, მომხმარებლები მსოფლიოს ყველა მიმართულებას განიხილავენ და საკუთარი ბიუჯეტის მიხედვით გეგმავენ. თუ მანამდე იტალიაში პირობითად, რომი, ფლორეცია, ვენეცია იყო ძირითადი არჩევანი, ახლა უფრო ხშირად იტალიის საზღვაო მიმართულებას ირჩევენ, ნეაპოლიდან პალერმომდე მონაკვეთში. ხშირია მოთხოვნა მალტაზე. ეგზოტიკური მიმართულებები ყოველთვის იყო, მაგალითად, მალდივები, ზანზიბარი, თუმცა ძალიან მაღალბიუჯეტურია და მომხმარებელიც შედარებით ნაკლებია,“-აღნიშნა ნიკა გოგოლაძემ.
