სასტუმრო "სანსეტ შოვის" მიმდებარედ მეწყერი ჩამოწვა

ონის მუნიციპალიტეტში, კურორტ შოვის ტერიტორიაზე, სასტუმრო „სანსეტ შოვის“ მიმდებარედ მეწყერი ჩამოწვა.ამის შესახებ ინფორმაცია საქართველოს პირველ არხს რაჭის გუბერნატორმა, პაპუნა მარგველიძემ დაუდასტურა.

როგორც მარგველიძემ აღნიშნა, ადგილზე სამაშველო ჯგუფები მუშაობენ.

მისივე ინფორმაციით, შემთხვევის ადგილისკენ მიემართებიან ადგილობრივი ხელისუფლების წარმომადგენლები.

აღნიშნულთან დაკავშირებით განცხადებას ავრცელებს შინაგან საქმეტა სამინისტრო.

"საზოგადოებრივ მართვის ცენტრ 112-ში შემოსულია არაერთი შეტყობინება შოვში მდებარე სასტუმრო „სანსეტ შოვში“ მეწყერის შედეგად მიწის მასის ჩამოშლასთან დაკავშირებით, გვსურს, საზოგადოებას მივაწოდოთ ინფორმაცია, რომ მომხდარის შესახებ ინფორმირებულია ყველა შესაბამისი უწყება, ადგილზე მობილიზებულია შესაბამისი ტექნიკა და ასევე, ხდება ტექნიკის დამატება.

შემთხვევის ადგილზე შინაგან საქმეთა სამინისტროს სასაზღვრო პოლიციის ორი ვერტმფრენით მიემგზავრებიან საგანგებო სიტუაციების მართვის სამსახურის მაშველები და სხვა საპოლიციო დანაყოფის წარმომადგენლები.

ამ ეტაპზე, დაშავებულების შესახებ დაზუსტებული ინფორმაცია არ არის, დამატებით ინფორმაციას ეტაპობრივად მოგაწვდით“, – ნათქვამია განცხადებაში.

1tv.ge