ქუთაისის აეროპორტმა სექტემბერში 99 079 მგზავრი გაატარა
ქუთაისის საერთაშორისო აეროპორტში მგზავრთნაკადი სექტემბერში 8%-ით გაიზარდა.
საქართველოს აეროპორტების გაერთიანების ინფორმაციით, დავით აღმაშენებლის სახელობის აეროპორტით 99 079 მგზავრმა ისარგებლა (2019 წლის სექტემბერი 91 713 მგზავრი).
მგზავრთნაკადის გარდა, სექტემბერში, ქუთაისის საერთაშორისო აეროპორტში ავიარეისების რაოდენობის კუთხითაც ზრდა იყო. სექტემბერში, აეროპორტში რეისები 38%-ით გაიზარდა და 418 რეისს მოემსახურა ( 2019 წლის სექტემბერი - 302 რეისი).
ამ ეტაპისთვის, ქუთაისის საერთაშორისო აეროპორტში 6 ავიაკომპანია 17 ქვეყნის 28 მიმართულებით ოპერირებს.
შეგახსენებთ, 10 ოქტომბრიდან 24 ოქტომბრის ჩათვლით, ქუთაისის საერთაშორისო აეროპორტში ასაფრენი-დასაფრენი ზოლის სრული რეაბილიტაცია განხორციელდება. ამ პერიოდში ქუთაისის აეროპორტში ავიაკომპანიები ფრენებს თბილისის საერთაშორისო აეროპორტიდან შეასრულებენ.
