გასტრონომიული ტურიზმის ასოციაცია ქართული თევზეულის ძველ რეცეპტებს აღადგენს
გასტრონომიული ტურიზმის ბიზნეს ასოციაცია ქართული თევზეულის ძველ რეცეპტებს აღადგენს. ამის შესახებ გადაცემა „ბიზნესი რუსთავი 2-ს“ ასოციაციის თანადამფუძნებელმა, ქეთი კვიჭიძემ განუცხადა.
მისი ინფორმაციით, კულინარიული ექსპედიცია აჭარის სერვისების განვითარების სააგენტოსთან ერთად უკვე დაწყებულია და მალე საზოგადოებისთვისაც ცნობილი გახდება. შემდგომში კი ბიზნესებმა სექტორის განვითარება უნდა მოახდინონ.
„ჩვენი კვლევის შედეგად, რომელსაც იხტიოლოგებთან ერთად ვატარებდით, მხოლოდ ძველი წიგნებითა და ინფორმაციებით 100 რეცეპტი მოვიძეთ. მათ შორის იყო - მიდიები, კიბორჩხალები, ასევე რაპანი, რომელიც შავ ზღვაში მოიპოვება. „ - აცხადებს კვიჭიძე.
როგორც გასტრონომიული ტურიზმის ბიზნეს ასოციაციის თანადამფუძნებელი აღნიშნავს, ყველაზე მეტი რეცეპტი ზღვისპირეთში აღმოაჩინეს, თუმცა რეცეპტებს სხვა რეგიონებშიც მიაკვლიეს.
ამჟამად, შეფ-მზარეულებთან ერთად რეცეპტების წიგნზე აქტიური მუშაობა მიმდინარეობს, რომლის პოპულარიზაციაც საზოგადოებაში მოხდება.
