ეგვიპტის ტურებზე მაღალი მოთხოვნაა - ფასები 1300 ლარიდან იწყება

ეგვიპტურმა ავიაკომპანია Air Cairo-მ საქართველოს მიმართულებით ფრენები განაახლა.

როგორც AviaNews-ს საქართველოში Air Cairo-ს ​ გენერალური აგენტი კომპანია “ავიაქსელის” (Avianet) ხელმძღვანელმა ამირან აბესაძემ განუცხადა, Air Cairo-მ შარმ-ელ-შეიხი-თბილისი-შარმ-ელ-შეიხის საჰაერო ხაზზე ოპერირება 11 აპრილიდან აღადგინა. რეისები ამ დროისათვის კვირაში ერთი სიხშირით, თუმცა 1-ელი ივლისიდან კვირაში ორი სიხშირით, ყოველ ოთხშაბათს და კვირას განხორციელდება. 

“ეგვიპტის ტურებზე საკმაოდ მაღალი მოთხოვნაა. ტურის ღირებულება 1300 ლარიდანაა ორმხრივი ავიაბილეთის ჩათვლით. ვყიდით, როგორც ერთ კვირიან ასევე 2 კვირიან ტურებსაც. გვქონდა შემთხვევა, როდესაც ჩვენმა მომხმარებელმა ეგვიპტის 1-თვიანი ტურისტული პაკეტი შეიძინა. რაც მთავარია ეგვიპტეში შესასვლელად PRC ტესტის “ნეგატიური” პასუხია საჭირო”, - აცხადებს ამირან აბესაძე. 

ეგვიპტური ავიაკომპანია Air Cairo საქართველოს საავიაციო ბაზარზე 2014 წლიდან ოპერირებდა და თბილისის მიმართულებით ფრენებს შარმ-ელ-შეიხიდან და ჰურგადადან ახორციელებდა.

Air Cairo წარმოადგენს EGYPT AIR-ის წილობრივ საკუთრებაში მყოფ შვილობილ ავიაკომპანიას, რომელიც დაბალ ტარიფიან (Low Cost) მოდელზე დაფუძნებულ სერვისებს სთავაზობს მგზავრებს.