ბათუმის აეროპორტი წელიწადში 1,2 მლნ მგზავრის მომსახურებას შეძლებს

ბათუმის საერთაშორისო აეროპორტში მიმდინარე ინფრასტრუქტურული სამუშაოები დასრულდა.

თბილისისა და ბათუმის საერთაშორისო აეროპორტების ოპერატორმა კომპანია TAV Georgia-მ ბათუმის აეროპორტის გაფართოების პროექტის საინვესტიციო ღირებულება $17 მლნ-მდე გაზარდა.

პროექტის განხორციელების შედეგად აეროპორტის გამტარუნარიანობა გაორმაგდა და წელიწადში 1 200 000 მგზავრის მომსახურებას შეძლებს.

პროექტის ფარგლებში გაფართოვდა არსებული სამგზავრო ტერმინალის შენობა, როგორც მოფრენის, ისე – გაფრენის მხარეს. ახალი ტერმინალის შენობის მთლიანი ფართობი 4000 მ2 -დან 8000 მ2-მდე გაიზრდა.

ნაწილობრივ გაფართოვდა ბარგის დამუშავების ზონა, სადაც დაინერგა ავტომატური კონვეერული სისტემა და დამონტაჟდება დამატებით 1 ბარგის კარუსელი. სარეგისტრაციო დახლები 8-დან 14 მდე, საზღვრის დაცვის ჯიხურები მოფრენაში 6-დან 12-მდე, გაფრენაში კი 6-დან 8-მდე გაიზრდა. გაფრენის ზონაში დაემატა ავტობუსის 2 გასასვლელი, ჯამში მგზავრები ავტობუსის 6 გასასვლელით ისარგებლებენ. ასევე გაფართოვდა „დუტი ფრის“ ზონა, „ბიზნეს ლაუნჯი“ და აეროპორტის მანქანების სადგომი. აეროპორტს დაემატა საერთაშორისო სტანდარტებით აღჭურვილი კვების ობიექტები.

აეროპორტის გაფართოების გადაწყვეტილება მენეჯმენტმა პანდემიამდე მიიღო და ფრენების შეჩერებისა და არსებული კრიზისის ფონზე კი სამუშაოები არ შეუჩერებია.

აეროპორტი დღეს პრემიერ-მინისტრმა და ეკონომიკისა და მდგრადი განვითარების მინისტრმა დაათვალიერეს.