1-ელი თებერვლიდან ფრენების აღდგენასთან ერთად ვიზიტორებისთვის რეგულაციები შემსუბუქდება

1 თებერვლიდან რეგულარული ფრენების აღდგენასთან ერთად საქართველოს მოქალაქეებისთვის გარკვეული რეგულაციები შემსუბუქდება, - განაცხადა ეკონომიკის მინისტრმა საკოორდინაციო საბჭოს შემდეგ გამართულ ბრიფინგზე.

ნათია თურნავას თქმით, კოვიდ უარყოფით საქართველოს მოქალაქეებს ქვეყანაში შემოსვლისას შესაძლებლობა ექნებათ 8 დღიანი თვითიზოლაციის გავლის ნაცვლად, მესამე დღეს, საკუთარი ხარჯებით ჩაიტარონ PCR ტესტირება, ამ შემთხვევაში ისინი თვითიზოლაციისგან გათავისუფდებიან.

რაც შეეხება კოვიდ დადებით საქართველოს მოქალაქეებს, მათთვის 12-ის ნაცვლად 8 დღიანი თვითიზოლაცია წესდება.

მინისტრის თქმით, უცხოელი ვიზიტორების შეთხვევაში კი საზღვარზე ნებისმიერი ტიპის კოვიდ ვაქცინაციის კურსის ჩატარების დამადასტურებელი დოკუმენტის წარდგენისას, მათ საქართველოში შემოსვლა უპირობოდ შეეძლებათ.

რაც შეეხება არავაქცინირებულ მოქალაქეებს: აშშ-დან, შვეიცარიიდან, ისარელიდან, არაბეთის გაერთიანებული საემიროებიდან, საუდის არაბეთიდან, ბახრეინიდან და ევროკავშირის ქვეყნებიდან საქართველოში შემოვლენ 72 საათის განმავლობაში ჩატარებული PCR ტესტის “ნეგატიური” პასუხით და ქვეყანაში შემოსვლიდან მესამე დღეს კიდევ ერთხელ ჩაიტაონ PCR ტესტი.

ნათია თურნავა ავიაკომპანიებს მიმართავს, რომ მგზავრებს, რომელთაც არ ექნებათ ტესტის პასუხი ან კოვიდ ვაქცინის ჩატარების დამადასტურებელი საბუთი, თვითმფრინავის ბორტზე არ აუშვას.