Phubber-მა 700 000 ლარიანი ინვესტიცია მოიზიდა

ქართულმა ონლაინ პლატფორმა Phubber-მა 700 000 ლარიანი ინვესტიცია მოიზიდა.

ამერიკელი ინვესტორის, GITA-სა და საქართველოს ბანკის მიერ Phubber-ისთვის გამოყოფილი თანხა სტარტაპის აპლიკაციის განვითარებას მოხმარდება. Phubber-ი 500 სტარტაპ ჯორჯიას აქსელერაციის პროგრამის მეორე რაუნდშიც გადავიდა და ის საქართველოს ბანკის მიერ გამოვლენილი ტოპ ხუთეულიდან ერთ-ერთია.

Phubber-ის დამფუძნებელი ანანო დოლაბერიძე „ბიზნესპარტნიორთან“ ინვესტიციასა და კომპანიის გეგმებზე საუბრობს. 

„მეორედ გავიმარჯვეთ GITA-ს დაფინანსების პროგრამაში და საბოლოო ინვესტიცია 700 000 ლარია, რომელიც კომპანიას წლის ბოლომდე უნდა მოხმარდეს. მე და ჩემმა პარტნიორმა გიორგი ჩუგოშვილმა დავიწყეთ მცირე ბიუჯეტით, თუმცა დღეს უკვე ტექნოლოგიურადაც წინ ვართ,  ამ ინვესტიციით შევძლებთ კიდევ უფრო განვავითაროთ კომპანია და ავტომატიზაციის პროცესები, რაც დიდ მასშტაბებზე მუშაობის შესაძლებლობას მოგვცემს. რაც შეეხება პანდემიას, ძალიან კარგად შევძელით სიტუაციას მოვრგებოდით, იყო გამოწვევბი, მოგვიწია გუნდის დისტანციურ მუშაობაზე გადაყვანა, თუმცა აპრილ–მაისშიში გაყიდვების მაღალი მაჩვენებელი გვქონდა და შემიძლია ვთქვა, რომ ჩვენთვის ეს ერთ-ერთი საუკეთესო პერიოდი იყო,“– აღნიშნავს ანანო დოლაბერიძე.

Phubber-ის წარმომადგენლის თქმით, აპლიკაციასთან ერთად, 10 დღეში, მომხმარებლებს შესაძლებლობა ექნებათ ისარგებლონ საიტით, რაც კომპანიის მუშაობას უფრო პროდუქტიულს გახდის.

„ამ ეტაპზე ვხედავთ განვითარების პერსპექტივას გლობალურ ბაზარზე და ვფიქრობ, ეს დიდი გამოწვევაა, რადგან ბევრია სამუშაო 2 საუკეთესო სტარტაპს შორის მოსახვედრად. Phubber-ის მსგავსი აპლიკაციები ამერიკასა და ევროპაში მრავლადაა, ამიტომ გვინდა კავკასიის რეგიონი და ევროპის რამდენიმე ქვეყანა მოვიცვათ. პირველ ეტაპზე, განიხილება სომხეთი და აზერბაიჯანი,“ – ამბობს ფაბერის დამფუძნებელი.

სტარტაპს, რომელიც ტანსაცმლის, ფეხსაცმლისა და აქსესუარების მყიდველებს გამყიდველებთან აკავშირებს, ამ ეტაპზე 70 ათასი რეგისტრირებული მომხმარებელი ჰყავს.