UNDP: მოსახლეობის არასაკმარისი ფიზიკური აქტივობა საქართველოს წელიწადში 16.8 მლნ უჯდება
გაეროს განვითარების პროგრამა UNDP-ის კვლევის მიხედვით, 2020 წელს საქართველოში მოსახლეობის არასაკმარისი ფიზიკური და სპორტული აქტივობა სახელმწიფოს ყოველწლიურად 16.8 მილიონ ლარზე მეტი უჯდება.
სხვადასხვა კვლევის მიხედვით, 18-დან 69 წლამდე მოსახლეობის 82.4% (კაცების 72.2%, ქალების 91.8%) არ არის ინტენსიურად დატვირთული ფიზიკური აქტივობით, ხოლო სკოლის მოსწავლეთა საერთო რაოდენობის მხოლოდ 20% ირიცხება სპორტულ სექციებსა და კლუბებში.
მოსახლეობის დაბალ ფიზიკურ და სპორტულ აქტივობაზე მრავალი ფაქტორი ახდენს გავლენას. მათ შორისაა: არასაკმარისი დრო ვარჯიშისთვის, მოტივაციის უქონლობა, მოუწესრიგებელი სპორტული ობიექტები და ღია საჯარო სივრცეებში შესაბამისი ინფრასტრუქტურის ხელმისაწვდომობის პრობლემა, დაბალი შემოსავლები, სპორტული პროგრამების სიმცირე, დაზიანების მიღების რისკი და სხვა.“ ნათქვამია UNDP-ის მიერ.
შეგახსენებთ, რომ გაეროს განვითარების პროგრამა (UNDP) გაერთიანებული ერების ორგანიზაციის ერთერთი უმსხვილესი სააგენტო და განვითარების საკითხებზე მომუშავე წამყვანი საერთაშორისო ორგანიზაციაა. UNDP-ის წარმომადგენლობა საქართველოში 1993 წელს გაიხსნა და მისი საქმიანობა მოიცავს საქართველოს განვითარებისათვის მნიშვნელოვან სფეროებს, როგორიცაა დემოკრატიული მმართველობის რეფორმა, მდგრადი და ყოვლისმომცველი ეკონომიკური ზრდა, გარემოსდაცვითი მმართველობის ჩამოყალიბება, კონფლიქტის მშვიდობიან გარდაქმნა და მდგრადი განვითარების მიზნების მიღწევა.
