წყნეთის გზატკეცილზე საგზაო სამუშაოები დასრულდა
წყნეთის გზატკეცილზე, ლევან სამხარაულის სახელობის სასასმართლო ექსპერტიზის ეროვნული ბიუროს მიმდებარე ტერიტორიაზე საგზაო სამუშაოები ჩატარდა.
„დღეს კიდევ ერთი პროექტი დავასრულეთ. ეს არის ბაგების გზაგამყოფი, რომელიც მოსაწესრიგებელი იყო. ამ პროექტის ფარგლებში, დღეს უკვე გადაადგილება კიდევ უფრო თავისუფლად არის შესაძლებელი, რადგან ავტობუსისთვის შესაბამისი ზოლი მოეწყო. გარკვეულწილად, პრობლემას წარმოადგენდა ასევე, უჩანეიშვილის ქუჩაზე ასასვლელი გზა. ეს ყველაფერი მოწესრიგებულია. როგორც კი ხიდის მშენებლობის სამუშაოები დასრულდება, შემდეგი ეტაპი იქნება გაგრძელებაზე, ბაგების მთლიანი მოწესრიგება თავისი ინფრასტრუქტურით - საპარკინგე ადგილებით და საფეხმავლო ბილიკებით, რომელიც ადგილობრივი მოსახლეობისთვის პრობლემას წარმოადგენს“, -განაცხადა თბილისის მერმა კახა კალაძემ.
დედაქალაქის მერიის ინფორმაციით, აღნიშნულ მონაკვეთზე ქვეითთა უსაფრთხოდ და კომფორტულად გადაადგილების მიზნით, გაფართოვდა ტროტუარები, მოეწყო შუქნიშნით დარეგულირებული „ზებრა“ გადასასვლელები და განახლდა ავტობუსის გაჩერებისთვის საჭირო ინფრასტრუქტურა.
აღნიშნული ტერიტორია სრულად ადაპტირდა შშმ პირებისთვის. ამასთანავე, ქუჩის დიზაინი ითვალისწინებს კერძო ავტომობილების მოძრაობისას უსაფრთხოების ნორმების დაცვას.
