წყალმომარაგების სექტორის რეფორმისთვის AFD-ი საქართველოს €30 მლნ-ს გამოუყოფს
საფრანგეთის განვითარების სააგენტო (AFD) საქართველოს წყალმომარაგებისა და წყალარინების სექტორის რეფორმისთვის 30 მლნ ევროს გამოუყოფს.
ფინანსური რესურსის გამოყოფის თაობაზე დოკუმენტს ხელი უკვე მოეწერა.
როგორც ფინანსთა სამინისტროში აცხადებენ, AFD-ის მიერ ამ რეფორმის მხარდაჭერა სრულად შეესაბამება საქართველოს წყალმომარაგებისა და წყალარინების სექტორის მდგრადი განვითარების იმ პროგრამას, რომელიც დაფინანსებულია აზიის განვითარების ბანკის (ADB) მიერ.
უწყების ცნობით, აზიის განვითარების ბანკმა წყალმომარაგებისა და წყალარინების სექტორის მდგრადი განვითარების პროგრამის დასაფინანსებლად გასულ წელს გამოყო ფინანსური რესურსი ორ ტრანშად, 115 310 000 ევროს ოდენობით.
საქართველომ 2021 წლის იანვარში პირველი ტრანშის სახით მიიღო 70 960 მლნ ევრო, ხოლო 2021 წლის დეკემბერში - მეორე ტრანში 44 350 მლნ ევროს ოდენობით.
"ADB-ის პროგრამის მეორე ტრანშის, 30 მლნ ევროს ოდენობით თანადაფინანსებით, საფრანგეთის განვითარების სააგენტო მხარს უჭერს საქართველოს გააუმჯობესოს მმართველობა წყალმომარაგებისა და წყალარინების სექტორში, გააძლიეროს ურბანული და სოფლის წყალმომარაგებისა და წყალარინების სექტორის მართვა, ასევე, საქართველოს გაერთიანებული წყალმომარაგების კომპანიის (UWSCG) ინსტიტუციური შესაძლებლობები", - აცხადებენ ფინანსთა სამინისტროში.
