ტრანსპორტსა და რესტორნებში რეკომენდაციების შესრულებაზე კონტროლი მკაცრდება

საზოგადოებრივი თავშეყრის ადგილებში, მათ შორის რესტორნებსა თუ სარეკრეაციო სივრცეებში, ასევე - საზოგადოებრივ ტრანსპორტში დადგენილი წესებისა და სტანდარტების კონტროლი გამკაცრდება.

დარღვევების შემთხვევაში ობიექტები და დაწესებულებები კანონის შესაბამისად დაჯარიმდებიან.

უწყებათშორისი კომისია შეზღუდვების მოხსნისა და ეკონომიკის ამუშავების ფონზე მოქალაქეებს აფრთხილებს რომ მოდუნების საფუძველს არ იძლევა და მათ წესების დაცვისკენ მოუწოდებს. კვლავ ძალაში რჩება რეკომენდაცია, რომლის თანახმად, საჯარო სამსახურში დასაქმებული პირები მუშაობას დისტანციურ რეჟიმში განაგრძობენ. 

ასევე ძალაში რჩება მკაცრი საკარანტინო რეჟიმი ბოლნისის მუნიციპალიტეტის ორ სოფელში - მუშევანსა და გეტაში, რომლებთან დაკავშირებითაც დამატებით გადაწყვეტილებას უწყებათაშორისი საკოორდინაციო საბჭო იქ არსებული ეპიდემიოლოგიური მდგომარეობის განვითარების საფუძველზე მიიღებს.

გაზრდილი ეპიდემიოლოგიური რისკების ფონზე, კი შესაბამისი უწყებები ტესტირებების გაფართოებაზე მუშაობენ.

დღევანდელი მონაცემებით, საქართველოში კორონავირუსით ინფიცირების 837 დადასტურებული შემთხვევაა, საიდანაც 697 პირი უკვე გამოჯანმრთელდა. უცხოეთიდან სამკურნალოდ საქართველოში გადმოყვანილია საქართველოს 3 მოქალაქე. გარდაცვლილია 13 ადამიანი.

კარანტინში იმყოფება 3 213 ადამიანი, სტაციონარში, მეთვალყურეობის ქვეშ - 303 პირი.