საზოგადოება
27/04/2021
Sinopharm-ით ვაქცინაციაში 18 წლის ზემოთ მოქალაქეები ჩაერთვებიან
“სინოფარმით“ ვაქცინაციის პროცესში 18 წლის ზემოთ მოქალაქეები ჩაერთვებიან-ამის შესახებ ჯანდაცვის მინისტრმა ეკატერინე ტიკარაძემ იმუნიზაციის საბჭოს სხდომის დასრულების შემდეგ განაცხადა.
18 წელს ზემოთ მოქალაქეები ჩინური "სინოფარმით" ვაქცინაციისთვის რეგისტრაციის გავლას დღეს, 20:00 საათიდან შეძლებენ, ქვეყანაში "სინოფარმით" აცრები კი მაისიდან დაიწყება.
მინისტრის განცხადებით, საქართველოში იმუნიზიაციის პროცესი ეტაპობრივად გაფართოვდება.
"18 წელს ზემოთ მოქალაქეებისთვის პორტალი 20:00 საათზე გაიხსნება. გაფართოვდება ქსელიც, სადაც მოხდება ჩვენი მოქალაქეების ვაქცინაცია, კერძოდ მას 78 ცენტრი დაემატება. უკვე გადამზადებულია 100-ზე მეტი ჯგუფი, რომელიც საქართველოს მოქალაქეების ვაქცინაციას უზრუნველყოფს. საერთო ჯამში, საქართველოში ვაქცინაციის პროცესი 138 ცენტრში იქნება შესაძლებელი ,“-აღნიშნა ეკატერინე ტიკარაძემ.
როგორც ჯანდაცვის უწყებაში აცხადებენ, „სინოფარმის“ ვაქცინა 35 ქვეყანაშია აღიარებული და ჩინეთის მწარმოებლებს სხვადასხვა ქვეყანაში 200 მილიონზე მეტი დოზა აქვთ გაცემული.
აცრისთვის ჯავშნის გასაკეთებლად უნდა ეწვიოთ booking.moh.gov.ge ან დარეკოთ ნომერზე 15 22.
