რეგისტრირებული ძაღლის ან კატის მიტოვება დასჯადი ხდება - რამდენი იქნება ჯარიმა

პატრონის მიერ რეგისტრირებული ძაღლის ან კატის მიტოვება შეიძლება ადმინისტრაციულად დასჯადი გახდეს, - იურიდიულ საკითხთა კომიტეტმა პირველი მოსმენისთვის განიხილა და მხარი დაუჭირა ადმინისტრაციულ სამართალდარღვევათა კოდექსში შესატან ცვლილებებს.

კანონპროექტის თანახმად:

რეგისტრირებული ძაღლის ან კატის მიტოვება პატრონის მიერ, - გამოიწვევს მეპატრონე ფიზიკური პირის 500 ლარით, განმეორების შემთხვევაში 1 000 ლარით დაჯარიმებას. კანონპროექტის მიხედვით, იგივე ქმედება, ჩადენილი მეპატრონე იურიდიული ან/და ინდივიდუალური მეწარმის მიერ დაისჯება 1 500 ლარით, განმეორებით შემთხვევაში - 3000 ლარით.

კანონპროექტის ერთ-ერთი ინიციატორის, პარლამენტის წევრის, ლევან იოსელიანის განცხადებით, მნიშვნელოვანია, სახელმწიფოს ჰქონდეს გამოკვეთილი და სწორი ხედვა შინაურ ცხოველებთან დაკავშირებით.

„ასეთი მუხლი არის ყველა ცივილიზებული ქვეყნის სამართალდარღვევათა კოდექსში, რომელიც კრძალავს შინაური ცხოველის მიტოვებას, მათდამი სასტიკ და უდიერ მოპყრობას. აქედან გამომდინარე, მიგვაჩნია, რომ ეს ცვლილებები შეტანილი უნდა იყოს ადმინისტრაციულ სამართალდარღვევათა კოდექსში. სხვა საპარლამენტო კომიტეტებმა მხარი დაუჭირეს ჩვენს ინიციატივას კონკრეტული დათქმებით, რომლის გათვალისწინებითაც უნდა მოხდეს საბოლოოდ ამ კანონპროექტის მიღება. მთავარი დათქმა ის არის, რომ კანონი კომპანიონი ცხოველების შესახებ, რომლის მიღებაც დაგეგმილია, უნდა ამოქმედდეს ამ ცვლილებებთან ერთად იმისთვის, რომ კანონი აღსრულების ნაწილში იყოს ეფექტური", - განაცხადა ლევან იოსელიანმა.