პური 10 თეთრით გაიაფდა
პურის ფასი 10 თეთრით შემცირდა. როგორც „იფქლი დიღომის“ მარკეტინგის მენეჯერმა, სოფიო ბედიაშვილმა „ბიზნესპარტნიორს განუცხადა, კომპანია უკვე ორი დღეა, რაც სასურსათო მაღაზიებს ე. წ. სოციალურ ანუ საყოველთაო მოხმარების პურს ათი თეთრით დაბალ ფასად აწვდის.
„ორი დღეა, რაც ჩვენთან ყველაზე მოთხოვნადი, პურის წამყვანი პოზიციები გაიაფდა 10 თეთრით, ეს არის ჩვენი კომპანიის საერთო გაყიდვების დაახლოებით 85%. ფასების შემცირება შეეხო ორი წონითი კატეგორიის ე.წ. ბატონის პურს, ასევე გაიაფდა დაჭრილი სახით ბატონი პური და პრემიუმ კლასის პურიც, რომელიც უმაღლესი ხარისხის ხორბლის ფქვილით მზადდება. გასულ წელსაც იყო გაიაფების შესაძლებლობა და პრემიუმ კლასის პურებზე მაშინაც შევამცირეთ ფასი,-“განმარტა სოფიო ბედიაშვილმა.
რაც შეეხება პროგნოზებს, კომპანიას სამომავლო ფასებთან დაკავშირებით პროგნოზის გაკეთება ამ ეტაპზე უჭირს.
„ვითარება ძალიან არაპროგნოზირებადია. წინასწარ არ გვაქვს ინფორმაცია რა მდგომარეობა იქნება ბაზარზე, თუმცა, როცა გვაქვს შესაძლებლობა, ჩვენ ფასებს აუცილებლად ვაკორექტირებთ.“ - განმარტა სოფიო ბედიაშვილმა.
