პრეზიდენტი: ვთხოვ ზელენსკის, დააბრუნოს საქართველოში უკრაინის ელჩი
სალომე ზურაბიშვილი უკრაინის პრეზიდენტს, ვოლოდიმერ ზელენსკის სთხოვს საქართველოში უკრაინის ელჩი დააბრუნოს.
ამ განცხადებით სალომე ზურაბიშვილმა მეგობარი ქვეყნის პრეზიდენტს საპარლამენტო ტრიბუნიდან მიმართა.
"მივმართავ ვოლოდიმერ ზელენსკის და ვთხოვ, დააბრუნოს ელჩი, რადგან ჩვენ ორ ერს შორის ამ უმძიმეს წუთებში კავშირი სრულიად გამყარდეს და იყოს უფრო მჭიდრო და უდრეკი. ამ ურთულეს პერიოდში მაინც გავახილოთ თვალი და შევიგნოთ, თუ რა ხდება ჩვენს თავს. ყველა ერთად აზრზე მოვიდეთ და ქვეყანას ვაჩვენოთ გეზი და გზა. გამოვასწოროთ ის, რაც წინსვლისა და წარმატების გზაზე გვაყენებს. ერთიანობა ჩვენი ერთადერთი გამოსავალია. აბსურდია, როცა პრეზიდენტს ბრალს სდებ საზოგადოების დაყოფაში მაშინ, როცა ის რუსთაველზე გამოჩნდა იმის გამო, რომ სრულიად საქართველო წარმოედგინა. ამავდროულად პრეზიდენტი რუსთაველზე მეგობარი ქვეყნის პრეზიდენტის მასპინძლად წარსდგა, როგორც ამას ქართული ზრდილობა მოითხოვს. ვისაც ეს არ ესმის, ერის ხმაც არ ესმის. საზოგადოებამ ეს ყველაფერი მშვენივრად გაიგო. დროა, ყველამ გაიგოს, რომ პრეზიდენტი არცერთი პოლიტიკური ძალის კუთვნილება არაა",- განაცხადა პრეზიდენტმა.
