პრემიერი: საპროცენტო განაკვეთის 26%-მდე დაწევა პენსიონერებისთვის შვება იქნება

პენსიონერებისთვის საპროცენტო განაკვეთი 26%-მდე დაიწევს. 

პრემიერ-მინისტრის ირაკლი ღარიბაშვილის განცხადებით, ეს პენსიონერებისთვის კიდევ ერთი შვება იქნება. 

"რამდენიმე თვის წინ, პარლამენტში ყოფნის დროს ერთ-ერთი ინიციატივა და მომართვა შეეხებოდა პენსიონერების საპროცენტო განაკვეთს, რომელიც საკმაოდ მაღალი იყო. წინა ხელისუფლების დროს ეს იყო 80%, 90%, 100%-ზე მეტი. რა თქმა უნდა ჩვენ მინიმუმადე დავწიეთ ეს საბანკო პროცენტი, მაგრამ 36% მაინც მაღალია პენსიონერებისთვის. ლევან დავითაშვილის ხელმძღვანელობით, ჩვენ შევქმენით კომისია, იმუშავეს ამ საკითხზე და შეჯერდნენ, რომ აღნიშნული 26%-ს არ აცდება, 26%-მდე დავწევთ განაკვეთს, რაც კიდევ ერთი შვება იქნება პენსიონერებისთვის", - აღნიშნა ირაკლი ღარიბაშვილმა. 

შეგახსენებთ, რომ სამთავრობო კომისიამ პენსიების მომსახურებაზე ბანკებისთვის ახალი პირობები შეიმუშავა. კონკურსი ბანკებისთვის თებერვლის ბოლოს გამოცხადდება. ახაი პირობების მიხედვით, საპენსიო სესხზე ზედა ზღვარი 26% იქნება, ხოლო პენსიონერთა პენსიების დარიგებას სახელმწიფო 15 მლნ ლარით დაასუბსიდირებს.

როგორც სამთავრობო კომისიის სხდომის შემდეგ გაცხადდა, კონკურსში მონაწილეობით დაინტერესებულია 2 ბანკი - „ლიბერთი“ და „საქართველოს ბანკი“.