პრემიერი რუსეთისთვის სანქციების დაწესებაზე: საქართველო პატარა ქვეყანაა, პრაგმატულად უნდა იმოქმედოს
ირაკლი ღარიბაშვილი რუსეთისთვის სანქციების დაწესებასთან დაკავშირებით აცხადებს, რომ საქართველო გადაწყვეტილებას ეროვნული ინტერესებიდან გამომდინარე მიიღებს.
"ჩვენ ვაკვირდებით ჩვენი დასავლელი პარტნიორების რეაქციას, ყურადღებით შევისწავლით სანქციებს, მის შესაძლო ეფექტებს როგორც რეგიონზე, ასევე ჩვენს ქვეყნაზე და ამის მიხედვით, ჩვენი ეროვნული ინტერესებიდან გამომდინარე მივიღებთ გადაწყვეტილებებს", - განაცხადა საქართველოს პრემიერმა.
ირაკლი ღარიბაშვილმა "რუსთავი 2"-ის ეთერში განაცხადა, რომ საქართველო პატარა ქვეყანაა რომელსაც თავისი როლი აქვს, და ქვეყანამ მშვიდად, ეროვნული ინტერესებს გათვალისწინებით და პრაგმატულად უნდა იმოქმედოს.
"ჩვენ ჩვენი შესაძლებლობების ფარგლებში მაქსიმალურად გვერდით ვუდგავართ უკრაინელ ხალხს, ჩვენ გვინდა, რომ უკრაინაში არ იყოს ომი, იყოს მშვიდობა, აღდგეს მათი ტერიტორიული მთლიანობა და მათი სუვერენიტეტი იყოს დაცული," - განაცხადა ირაკლი ღარიბაშვილმა.
შეგახსენებთ, რომ 21 თებერვალს ვლადიმერ პუტინმა უკრაინის ოკუპირებული რეგიონების, დონეცკის და ლუგანსკის დამოუკიდებლობა აღიარა, ამის საპასუხოდ ევროკავშირმა, აშშ-მ და სხვა ქვეყნებმა რუსეთს სანქციები დაუწესა. სანქციების ნაწილი უკვე ამოქმედდა, თუმცა საუბარია დამატებით სანქციების კიდევ უფრო გამკაცრებაზე.
