"პოლიტიკური დაძაბულობის გაგრძელება დამატებით კრიზისს გამოიწვევს ეკონომიკაში"

"ჯიპას" კანცლერი და გადაცემა "ბიზნესპარტნიორის" თანაწამყვანი გიორგი აბაშიშვილი მიიჩნევს, რომ ქვეყანა განსაკუთრებულ მდგომარეობაშია, COVID19-ის შემოტევისა და პოლიტიკური კონკურენციის, ისედაც შემცირებული ინვესტიციების ფონზე.

აბაშიშვილი მიიჩნევს, რომ დაძაბულობის გაგრძელება ეკონომიკაში დამატებით კრიზისებს გამოიწვევს.

„საქართველოსთვის უცხო არ არის არჩევნების შემდგომი კონკურენცია. ასეთ ვითარებაში, ინვესტორებს გარკვეული ტიპის მოლოდინები უჩნდებათ თუ რა მოხდება ქვეყანაში. გადაწყვეტილების მიღების პროცესში ისინი აკვირდებიან მოვლენების განვითარების სცენარებს. მოკლევადიან პერიოდში არ მგონია, ამ პროცესებმა განსაკუთრებული გავლენა იქონიოს ეკონომიკაზე, თუმცა მდგომარეობა დამოკიდებულია იმაზე, თუ როგორ გაგრძელდება პროტესტი,“– აღნიშნავს გიორგი აბაშიშვილი.

შეგახსენებთ, გუშინ ოპოზიციამ არჩევნების შედეგები გააპროტესტა. ცესკოსთან სამართალდამცველებმა დემონსტრანტების მიმართ წყლის ჭავლი ორჯერ გამოიყენეს. ამას წინ უძღოდა დაპირისპირება და აგრესია პოლიციელების მიმართ. აქცია და პროტესტი დღეს, 18:00 საათზე კვლავ არის დაგეგმილი.