საზოგადოება
28/09/2021
პირველი NFT ქართულ სპორტში - ძმები არველაძეების მაისური აუქციონზე იყიდება
ძმებმა,შოთა და აჩი არველაძეებმა 1997 წელს, ბრედასა და აიაქსის მატჩის შემდეგ გაცვლილი მაისურები გააციფრულეს და სხვადასხვა ბლოკჩეინ პლატფორმებზე დაბეჭდილ NFT (Non-Fungible Token) აქტივებად აქციეს. როგორც ფეხბურთელი შოთა არველაძე სოციალურ ქსელში აღნიშნავს, მაისურების ციფრული ვერსია აუქციონზე იყიდება.
"ძნელი დასაჯერებელია, რომ 15 წლის წინ Tesla, Twitter, Airbnb, Instagram და სხვა ბევრი ინოვაციური პროდუქტი, მათ შორის iPhone-ც კი არ არსებობდა. ტექნოლოგიური რევოლუცია დაჩქარებულია და ერთ-ერთი ბოლო ინოვაცია, სხვადასხვა ბლოკჩეინ პლატფორმებზე დაბეჭდილი NFT (Non-Fungible Token) აქტივებია.
NFT-ის გამოგონებამ, შესაძლებელი გახადა ნებისმიერი რამ (მატერიალური თუ არამატერიალური) ციფრულ აქტივად აქციო და გასაყიდად მსოფლიო ბაზარზე გაიტანო. ამის მაგალითებია, Jack Dorsey-ის (Twitter-ის CEO) პირველი ტვიტი რომელიც მან NFT აქტივად აქცია და $2.9 მილიონად გაყიდა; 40 წლის არტისტის Beeple (Mike Winkelman) შექმნილი NFT, რომელიც ნიუ იორკში Christie's-ს აუქციონზე $69 მილიონად გაიყიდა.
მე და აჩიმაც გადავწყვიტეთ, ჩვენს კარიერაში ერთ-ერთი ყველაზე ემოციური მომენტი და 1997 წელს, ბრედასა და აიაქსის მატჩის შემდეგ გაცვლილი მაისურები გავაციფრულოთ და ჩვენი ქომაგებისთვის (და არამარტო) NFT აქტივად ვაქციოთ, ციფრული ვერსია კი ხელმისაწვდომი გავხადოთ. ეს იქნება პირველი და ერთადერთი NFT, რომელსაც მე და აჩი ამ თემაზე გავაკეთებთ და შესაბამისად მყიდველს ექნება უნიკალური შანსი, რომ ამ მომენტის ციფრული ვერსიის მფლობელი გახდეს. ეს NFT-ი Ethereum-ის ბლოკჩეინზე დავიტანეთ და გაყიდვა აუქციონის წესით შემდეგი 30 დღის განმავლობაში მოხდება. აუქციონში მონაწილეობის მსურველები გადადით ქვემოთ მოცემულ ლინკზე.
P.S.
მადლობა Pavle Mgeladze-ს ამ ახალი ტექნოლოგიების გაცნობისა და ჩვენთვის დაუვიწყარი მომენტის გაციფრულებაში დახმარებისთვის,"-წერს შოთა არველაძე.
