მომსახურების სააგენტომ პრაქტიკული გამოცდისთვის 45 ავტომობილი შეიძინა
მომსახურების სააგენტომ მართვის უფლების მისაღები პრაქტიკული გამოცდისთვის 45 ერთეული ახალი ავტომობილი შეიძინა, - ინფორმაციას შინაგან საქმეთა სამინისტრო ავრცელებს.
უწყების განმარტებით, ახალი ავტომობილები, თანამედროვე GPS სისტემებით არის აღჭურვილი და საქართველოს მასშტაბით 10 ქალაქში, მომსახურების სააგენტოს სტრუქტურულ ერთეულებში გადანაწილდება.
„45 ახალი ავტომობილის შეძენა უზრუნველყოფს მართვის უფლების მისაღები პრაქტიკული გამოცდის მეორე ეტაპზე გამსვლელი კანდიდატებისთვის დამატებითი ადგილების გამოყოფას.“-აღნიშნულია უწყების მიერ გავრცელებულ ინფორმაციაში.
შეგახსენებთ, რომ 2022 წლის აპრილიდან მართვის მოწმობის გამოცდა ორეტაპიანი გახდა. მსურველებს პრაქტიკული გამოცდის ჩატარება მოედნის გარდა რეალურ მოძრაობაში, ქუჩაში უწევთ. გასულ წელს ჯამში 30 515 მართვის მოწმობა გაიცა.
