მდინარე იორდანესთან ქართული კულტურის ცენტრი აშენდება
მდინარე იორდანესთან მაცხოვრის ნათლობის ადგილის მიმდებარედ საქართველოს მიწა გადაეცა, სადაც ქართული კულტურის ცენტრი აშენდება. ამის შესახებ პრემიერ-მინისტრი ირაკლი ღარიბაშვილი აცხადებს.
"დღეს ჩვენ ისტორიული მოვლენის მონაწილენი ვართ - მისი უდიდებულესობა იორდანიის მეფის აბდულა მეორისა და მისი უმაღლესობა პრინც ღაზის მიერ მიღებული გადაწყვეტილებით, საქართველოს გადაეცა მიწა მდინარე იორდანესთან მაცხოვრის ნათლობის ადგილის მიმდებარედ. აქ აშენდება ქართული კულტურის ცენტრი. 300 წლის შემდეგ საქართველო ბრუნდება წმინდა მიწაზე. ყველა ქართველისთვის სასიხარულოა ეს მოვლენა. ფასდაუდებელი იყო საქართველოს კათოლიკოს-პატრიარქის ჩართულობა, მისი დიდი საერთაშორისო ავტორიტეტი, ერისა და ბერის ასეთი ერთიანობა ყოველთვის იყო, არის და იქნება ჩვენი ქვეყნის წინსვლისა და განვითარების უმთავრესი წინაპირობა", - განაცხადა პრემიერ-მინისტრმა.
