მაია ბითაძე: საქართველოში აღარ უნდა იყოს ისეთი საწარმო, რომელიც გარემოს დააბინძურებს
რუსთავში, საწარმო "ჯეოსტილი" ჰაერის დაბინძურების კუთხით მოწმდება.
პარლამენტის გარემოს დაცვისა და ბუნებრივი რესურსების კომიტეტის თავმჯდომარის მაია ბითაძის განცხადებით, "ჯეოსტილს" გამოსწორებული აქვს თვითმონიტორინგის და ჰაერის დაბინძურების კონტროლის სისტემა, თუმცა კომპანიის მხრიდან გარკვეული ღონისძიებები მაინც გასატარებელია, თუნდაც ჯართის მართვის კუთხით.
"ზოგადი ინსპექტირების ფარგლებში ჩვენ ამ პროცესებს შემდეგშიც კონტროლს გავუწევთ. მონიტორინგი გაგრძელდება რუსთავში არსებულ ყველა ქარხანაში, შევალთ თითოეულ ქარხანაში, რომლებსაც წლებია პრობლემები აქვს ატმოსფერული ჰაერის დაბინძურებასთან და თვითმონიტორინგის სისტემასთან დაკავშირებით. ჩვენი მიზანია, არა მხოლოდ რუსთავში, არამედ საქართველოში აღარ დარჩეს ისეთი საწარმო, რომლის ტექნოლოგიური ციკლი, არა მარტო ჰაერის, არამედ გარემოს შემადგენელ სხვა ელემენტებსაც დააბინძურებს",-აღნიშნა მაია ბითაძემ.
