კახა კალაძე: შევქმენით წინაპირობა, რომ ნებისმიერმა გუნდმა წარმატებით განაგრძოს მუშაობა
კახა კალაძემ თბილისის ურბანული პოლიტიკის პრეზენტაციაზე, ბოლო 4 წლის განმავლობაში განხორციელებული პროექტები შეაჯამა და ურბანული განვითარების შესაძლებლობებზე ისაუბრა.
მისი თქმით, თბილისს სწორად განვითარების გეზი აქვს აღებული და აღარასდროს დაუბრუნდება იმ ქაოტურ მდგოარეობას, რაც ადრე ხდებოდა.
„ჩემს გუნდთან ერთად ყველაფერს ვაკეთებდი და მომავალშიც გავაკეთებ, რომ ჩვენი სიცოცხლით სავსე ქალაქი კიდევ უფრო განვავითაროთ. ანგარიშვალდებული ვართ ყველა თბილისელის წინაშე თუ რას ვგეგმავდით და როგორ შევასრულეთ ეს დაპირებები. მიუხედავად ბევრი გამოწვევისა და კოვიდ პანდემიისა, მუხლჩაუხრელად ვიმუშავეთ და შევქმენით წინაპირობა, საკანონმდებლო ინიციატივებით, გენგეგმის მიღებით, რეფორმებით, იმისთვის რომ ნებისმიერმა გუნდმა წარმატებით განაგრძოს მუშაობა.
მიმაჩნია, რომ ყველაზე მნიშვნელოვანი, რაც ჩვენმა გუნდმა შექმნა არის ის საფუძველი, თუ როგორ თანმიმდევურლად უნდა განხორციელდეს რეფორმები, რომელიც აუცილებელია ჩვენთვის და ევროპული თანამედროვე დედაქალაქის ფუნქციონირებისთვის. მინდა მჯეროდეს, რომ ამ ქვეყანაში მიმდინარე პოლიტიკური ბატალიები თბილისის განვითარებაზე არ იმოქმედებს და ის საშინელი ქაოტური პროცესი, რაც ბოლო 30 წლის განმავლობაში გამოვიარეთ, საბოლოოდ წარსულს ჩაბარდა,“ – განაცხადა კალაძემ.
მისივე თქმით, მომავალში ამ რეფორმების გაგრძელებით, თბილისი იქნება გამართული ურბანული პოლიტიკის მატარებელი ქალაქი, თანამედროვე სატრანსპორტო დაქსელვით, მწვანე ზონებით და ეკოლოგიურად სუფთა გარემოთი.
