"ჯეოქეისის" არარეზიდენტი მკვლევარი კამპანიას "მოითხოვე უკრაინული უკრაინის ეკონომიკისათვის" აანონსებს
ანალიტიკური ორგანიზაცია „ჯეოქეისის“ არარეზიდენტი მკვლევარი ეკონომიკის მიმართულებით და კავკასიის უნივერსიტეტის (СIU) ბიზნესის ფაკულტეტის დეკანი გიორგი აბაშიშვილი ახალ კამპანიას „მოითხოვე უკრაინული უკრაინის ეკონომიკისათვის” აანონსებს.
გიორგი აბაშიშვილი სოციალურ ქსელში მოქალაქეებს მოუწოდებს, ყველა სავაჭრო ობიექტში უკრაინული პროდუქცია მოითხოვონ.
„მეგობრებო, ვიწყებ და ვიწყებთ კამპანიას „მოითხოვე უკრაინული უკრაინის ეკონომიკისათვის!“ ეს არის პირველ რიგში გულით და ემოციით ჩემი და ჩვენი მხარდაჭერის გამოხატვა უკრაინელებისადმი! ამ წუთიდან ყველგან, ყველა სავაჭრო ობიექტში, სადაც კი რაიმე ნივთი დაგვჭირდება ვითხოვთ უკრაინულს – პირველადი მოხმარების ნივთებიდან ყველა ნივთის ჩათვლით.
უკრაინა საქართველოს მნიშვნელოვანი სავაჭრო პარტნიორია. ასე რომ არჩევანიც დიდი გვაქვს – შეუძლებელს არ ვითხოვთ! დავუჭიროთ მხარი უკრაინის ეკონომიკას!
#მოითხოვეუკრაინული“, -წერს სოციალურ ქსელში გიორგი აბაშიშვილი.
