გარემოსდაცვითი ნებართვით გათვალისწინებული პირობების დარღვევაზე სანქციები მკაცრდება
გარემოსდაცვითი ნებართვით გათვალისწინებული პირობების დარღვევაზე ადმინისტრაციული სანქციები მკაცრდება, - ცვლილებები ადმინისტრაციულ სამართალდარღვევათა და სისხლის სამართლის კოდექსში შედის.
სანქციების ცვლილებები შეეხება რეკულტივაციის საკითხებს, ხე-ტყის დამზადების ლიცენზიანტებთან დაკავშირებული საკითხებს, ასევე დაურეგულირებელ თევზჭერას, ჰაერის დაბინძურებას, პლასტიკისა და ბიოდეგრადირებადი პარკების წარმოებისა და რეგულირების საკითხს.
გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა გარემოს დაცვისა და ბუნებრივი რესურსების კომიტეტის სხდომაზე კანონპროექტის პირველი მოსმენით წარდგენისას განაცხადა, რომ იგეგმება ადმინისტრაციული სახდელის ვადის გაზრდა ისეთ მნიშვნელოვან საკითხებზე, როგორიცაა გარემოსდაცვითი ნებართვით გათვალისწინებული პირობების დარღვევა, ასევე გადაშენების საფრთხის წინაშე მყოფი ფლორის და ფაუნის დაცვის საერთაშორისო კონვენციის მოთხოვნების დარღვევა.
მინისტრის მოადგილემ აღნიშნა, რომ კანონპროექტი მოიცავს რამდენიმე მნიშვნელოვან საკითხს, რომელიც გააძლიერებს სამინისტროს კომპეტენციებს აღსრულების ნაწილში.
ნინო თანდილაშვილის თქმით, საკანონმდებლო ცვლილებებით კანონი სრულ თანხვედრაში იქნება ევროკავშირის შესაბამის სტანდარტებთან.
კომიტეტის თავმჯდომარის, მაია ბითაძის განცხადებით, ცვლილებებთან დაკავშირებით კომიტეტს მომზადებული აქვს გარკვეული შენიშვნები რაზეც მეორე მოსმენამდე გააგრძელებენ მუშაობას. ამ დათქმით კომიტეტმა მხარი დაუჭირა განხილულ საკანონმდებლო ცვლილებებს.
