გახარია: სოციალური დახმარების სისტემა გადასახედია, ჯანდაცვის სამინისტრო რეფორმას ამზადებს

პრემიერი სოციალური დახმარების სისტემის რეფორმის აუცილებლობაზე აცხადებს. გიორგი გახარიამ განაცხადა, რომ ჯანდაცვბის სამინისტროს რეფორმაზე უკვე მუშაობს.

"მაქსიმალურად ვცდილობთ, შევინარჩუნოთ სამუშაო ადგილები, შესაბამისად ამოცანა #1 არის, რომ არ გაგვიჩნდეს უმუშევარი ადამიანი, რომელსაც არ უნდა დასჭირდეს სოციალური დახმარებისთვის მიმართვა, თუმცა მსგავსი რამ გამორიცხული არ არის და ეკონომიკური კრიზისიდან გამომდინარე ასეთი შემთხვევებიც გვექნება," - თქვა პრემიერმა პარლამენტში.

მთავრობის მეთაურის თქმით, სოციალური დახმარების მიზნობრიობის და კრიტერიუმების დამუშავების გადახედვის პროცესი, სისტემის რეფორმა უკვე დაწყებულია, თუმცა ეს არ არის მოკლევადიანი რეფორმა.

„ამიტომ, პანდემიისას დახმარების მიმღებთა ქულების რაოდენობა 65 ათასიდან 100 ათას ქულამდე გავზარდეთ. ეს არის ის შუალედური გარდამავალი მომენტი, რომელიც ახლა დააზღვევს იმ ადამიანებს, რომლებმაც პანდემიის გამო დაკარგეს სამსახური და ახლა იძულებული არიან, სოციალური დახმარებისთვის სახელმწიფოს მიმართონ. თუმცა, ეს არის დროებითი. სოციალური დახმარების სისტემა, როგორც ქულების, ასევე მიზნობრიობის და აღრიცხვის ნაწილში გეთანხმებით, რომ გადასახედია და ჯანდაცვის სამინისტრო ამ რეფორმას ამზადებს“, - აღნიშნა პრემიერმა.