"ძველი სანომრე ნიშნების ჩანაცვლების საინფორმაციო კამპანია უფრო აქტიური უნდა ყოფილიყო"
„ძველი სანომრე ნიშნების ახლით ჩანაცვლების საინფორმაციო კამპანია უფრო აქტიური უნდა ყოფილიყო,“- ამის შესახებ „ბიზნესპარტნიორს“ ტრანსპორტისა და გზების ასოციაციის“ თავმჯდომარემ განუცხადა.
დავით მესხიშვილის განმარტებით, ასეთი მასშტაბური რეგულაციის განხორციელებისთვის უნდა მომზადებულიყო სარეკლამო რგოლები.
„უკვე წლებია ვიცით, რომ უნდა შეგვეცვალა სანომრე ნიშნები. სამწუხაროდ, ყოველთვის ასე ხდება, რომ ბოლო დღეებში მიაწყდება ხალხის ნაკადი და ასე მოხდა ახლაც. ამ სიტუაციაში საჭირო იყო უფრო აქტიური საინფორმაციო კამპანია. ეს არ გულისხმობს იმას, რომ ერთმა პასუხისმგებელმა პირმა ინტერვიუ მისცეს. ეს დაგეგმილი უნდა იყოს შესაბამისი სარეკლამო რგოლებით და აგრესიული კამპანიით. სხვა შემთხვევაში ყოველთვის გვექნება რიგები. ეს რიგები მით უმეტეს ახლა, ამ პანდემიურ სიტუაციაში არ არის სასიამოვნო,“ - განაცხადა დავით მესხიშვილმა.
შეგახსენებთ, რომ სანომრე ნიშნების გამოცვლისთვის მძღოლებს დრო გასული წლის პირველ სექტემბრამდე ქონდათ. თუმცა მთავრობის გადაწყვეტილებით, ეს ვადა 7 თვით, 31 მარტამდე გახანგრძლივდა. ნომრის გამოცვლის მსურველთა აქტივობა რამდენიმე დღეა მნიშვნელოვნად გაიზარდა, მოიმატა რიგებმაც.
