ამირან გამყრელიძე: "ომიკრონით" გვაქვს როგორც გართულებები, ისე ფატალური შემთხვევები

ქვეყანაში 90%-95% "ომიკრონის" შტამი ცირკულირებს. 

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, "ომიკრონს" "დელტასთან" შედარებით მსუბუქი მიმდინარეობა აქვს, თუმცა გართულებები მასაც ახლავს და დაფიქსირებულია გარდაცვალების შემთხვევებიც. 

"ხშირად ისმის კითხვა "ომიკრონისგან" ადამიანები იღუპებიან თუ არა. რატომღაც მოარული ინფორმაციაა, რომ "ომიკრონი" ძალიან მსუბუქია და გადავიტანთ, არაფერი განსაკუთრებული არ იქნება. "ომიკრონით" გვაქვს, როგორც გართულებების, ისე ფატალური შემთხვევები", - აღნიშნა ამირან გამყრელიძემ. 

მისი თქმით, ქვეყანაში "ომიკრონის" 1754 ლაბორატორიულად დადასტურებული შემთხვევაა, აქედან შესწავლილია 1184, საიდანაც 50% იყო ორჯერ ვაქცინირებული, 14% რეინფიცირებაა. 38-ის შემთხვევაში ჰოსპიტალიზაციის საჭიროება დადგა, გარდაიცვალა 3. 

"თუმცა, ეს იმას არ ნიშნავს, რომ დეკემბრის მეორე ნახევარში ან იანვრის განმავლობაში, "ომიკრონისგან" გარდაიცვალა მხოლოდ 3 ადამიანი", - აცხადებს ამირან გამყრელიძე. 

ამირან გამყრელიძე ხაზგასმით აღნიშნავს ვაქცინაციის მნიშვნელობას, განსაკუთრებით ბუსტერდოზის.  

რაც შეეხება ზოგადად ქვეყანაში არსებულ ეპიდსიტუაციას, მიუხედავად იმისა, რომ ყოველდღიურად ახალი შემთხვევების რაოდენობა იზრდება, ჰოსპიტალური სექტორი გადატვირთული არ არის. 

"ძირითადი დატვირთვაა ამბულატორიულ და ლაბორატორიულ სექტორზე, მაგრამ სისტემა მუშაობს და უძლებს", - აღნიშნა ამირან გამყრელიძემ.