"ახალი ტფილისის" ფარგლებში 2 შენობის განახლებაზე ₾4.5 მლნ დაიხარჯება

თბილისის განვითარების ფონდი ანტონ კათალიკოსის ქუჩის #30 და #32-ში, პროექტ „ახალი ტფილისის“ ფარგლებში, სარეაბილიტაციო სამუშაოებს ახორციელებს. 

მიმდინარე სამუშაოების დათვალიერებისას კახა კალაძემ განაცხადა, რომ ამ მისამართების გარდა, კიდევ ერთ მისამართზე ერეკლე მეორის N6-ში შენობა-ნაგებობების რეაბილიტაცია 2022 წლის ზაფხულზე დასრულდება.

„ანტონ კათალიკოსის N30-სა და N32-ში, ასევე, ერეკლე მეორის N6-ში, ფაქტობრივად, თავიდან ბოლომდე შენდება სახლი, რადგან რეაბილიტაციას არ ექვემდებარებოდა. მოგვიწია დაშლა და ახლის აშენება. 2022 წლის ზაფხულისთვის ოთხივე სახლი მთლიანად იქნება დასრულებული. დაახლოებით 30 ოჯახი გვყავს დროებით ქირით გაყვანილი და რა თქმა უნდა, აღდგენითი სამუშაოების შედეგად შენობებს დაუბრუნდება პირვანდელი სახე. ყურადღება ექცევა ავთენტურობას, თითოეულ დეტალს. ძველი თბილისის აღმშენებლობა და რეაბილიტაცია მომავალი წლიდან აუცილებლად გაგრძელდება“, - განაცხადა კახა კალაძემ.

ამ ეტაპზე კათალიკოსის #30-ში მიმდინარეობს თუნუქის სახურავის და კარ–ფანჯრის მოწყობა, სამღებრო სამუშაოები, შიდა კედლების გალესვა და კაფელ-მეტლახის მოწყობა.

რაც შეეხება ანტონ კათალიკოსის #32–ს, ამ ეტაპზე მიმდინარეობს სახურავის გადახურვა, სარდაფის კიბის მოწყობა და შიდა კედლების გალესვა. სამუშაოების ფარგლებში უკვე აღდგენილია ფასადი და მოწყობილია კარ–ფანჯარა, ასევე, დაიშალა და ახლიდან მოეწყო აივნის ნაწილი.

ორივე პროექტი ითვალისწინებს შენობა-ნაგებობების სრულ რეაბილიტაცია-რესტავრაციას. სამუშაოების ღირებულება შეადგენს 4 501 000 ლარს.