96 ხიდი და 53 გვირაბი - რა ეტაპზეა რიკოთის საუღელტეხილო გზის მშენებლობა
რიკოთის საუღელტეხილო გზაზე ხიდებისა და გვირაბების მშენებლობა გრძელდება. ინფრასტრუქტურის სამინისტროს მონაცემებით, ამ დროისთვის სამშენებლო სამუშაოები რიკოთის საუღელტეხილო გზის ჩუმათელეთი-ხევის 11.6 კმ-იან, ხევი-უბისას 12.2 კმ-იან, უბისა-შორაპანის 13 კმ-იან და შორაპანი-არგვეთას 14.7 მონაკვეთებზე მიმდინარეობს.
ამ ეტაპზე, პარალელურად შენდება 71 ხიდი და 47 გვირაბი. 8 გვირაბი უკვე გაჭრილია და მიმდინარეობს მათი მოპირკეთების სამუშაოები.
რიკოთზე, საერთო ჯამში, დაგეგმილია 51.6 კმ-მდე სიგრძის გზის მშენებლობა, რომელიც 96 ხიდსა და 53 გვირაბს მოიცავს. რიკოთის მაგისტრალური გზის მშენებლობის დასრულება ეტაპობრივად 2021-2024 წლებშია დაგეგმილი. შესაბამისად, ამ დროისათვის თბილისიდან ბათუმში მგზავრობას მხოლოდ 3–3.5 საათი დასჭირდება. პროექტის მთლიანი ბიუჯეტი 2.6 მლრდ ლარამდეა.
უკვე სექტემბერში დაგეგმილია ახალი გზის 2 კმ-იან მონაკვეთის გახსნა, რომელიც 6 ხიდისა და 3 გვირაბისაგან შედგება
რიკოთის საუღელტეხილო მონაკვეთის მშენებლობას მთავრობა საუკუნის პროექტს უწოდებს. აქ მშენებლობა ურთულეს გეოგრაფიულ მარშრუტზე და ურთულესი საინჟინრო კონსტრუქციებით მიმდინარეობს.
რიკოთის საუღელტეხილო გზის მშენებლობის პროექტის ფარგლებში მოეწყობა სპეციალური სივრცეები, სადაც მიმდებარე სოფლების მოსახლეობას საკუთარი ნაწარმის გაყიდვის საშუალება ექნება. ასეთი სავაჭრო მეოდნები მოეწყობა სურამში, შროშასა და ზესტაფონში.
სამინისტროში განმარტავენ, რომ COVID 19-ის გამოწვევის მიუხედავად, რიკოთის უღელტეხილზე სამუშაოები არ გაჩერებულა, პროექტებზე ამჟამად დასაქმებულია 4000-ზე მეტი ადამიანი და დასაქმებულთა 68% საქართველოს მოქალაქეა.
