იმპორტიორებმა რუსული ხორბლის ყაზახურით ჩანაცვლება დაიწყეს

ხორბლის ექსპორტზე რუსეთის მიერ გაზრდილი საბაჟო ტარიფებისა და დაწესებული კვოტების გამო, ქართველმა იმპორტიორებმა რუსეთის ბაზრის ჩანაცვლებაზე დაიწყეს მუშაობა. ალტერნატივად ამ ეტაპზე ყაზახეთი განიხილება.

ყაზახეთიდან, საქართვეელოში უკვე შემოვიდა ხორბლის პირველი პარტია. იმპორტი „ბარაქამ“ განახორციელა. როგორც წისქვილკომბინატის გენერალურმა დირექტორმა განაცხადა, საუბარია 2 000 ტონა ხორბლის იმპორტზე, რომლის ჯამური მოცულობა 29 ვაგონია.

„1000 ტონა უკვე გადმოვიდა საქართველოს საზღვარზე და შესაბამის საბაჟო პროცედურებს გადის. უახლოეს ერთ კვირაში სრული მოცულობა შემოვა. სანამ რუსეთი საექსპორტო გადასახადს დააწესებდა, რუსული ხორბლის ფასი 280 დოლარის ფარგლებში მერყეობდა. საბაჟო ტარიფების ზრდის შემდეგ კი 1 ტონა რუსული ხორბლის შემოტანა 310-320 დოლარი ჯდება. აქედან გამომდინარე ყაზახური ხორბალი ფასით უკვე უწევს კონკურენციას, რადგან გარდაბანში ჩამოტანილი ყაზახური ხორბლის ფასი 280-დან 300 დოლარის ფარგლებში მერყეობს. დღეის მდგომარეობით, საქართველოსთვის ყაზახური ხორბალი კონკურენტუნარიანია, თუ საბაჟო გადასახადი შემცირდება რუსულ ბაზარზე, რისი მოლოდინიც მოკლევადიან პერიოდში ნაკლებად გვაქვს, ისევ გადავერთვებით რუსული ხორბლის იმპორტზე. რადგან რუსეთიდან ხორბლის იმპორტისას ტრანსპორტირება დაახლოებით 25 დოლარია. ყაზახეთიდან კი 100,“ - განაცხადა ლადო ბიძინაშვილმა.

შეგახსენებთ, რომ რუსეთმა ხორბლის ექსპორტზე საბაჟო გადასახადი 15 თებერვლიდან დააწესა. შედეგად, ერთი ტონა ხორბლის ექსპორტი 25 ევროთი იბეგრება. 1-ლი მარტიდან კი საბაჟო გადასახადი 50 ევრომდე იზრდება.