Asos-მა £295 მლნ-ად Topshop, Miss Selfridge და სხვა ცნობილი ბრენდები შეიძინა

საცალო ჯგუფმა Arcadia-მ წარუმატებელი მუშაობის შემდეგ, 295 მლნ ფუნტის გარიგებით, ონლაინ საცალო ვაჭრობის კომპანია Asos-ს ცნობილი ბრენდები Topshop, Topman, Miss Selfridge და HIIT-ი მიყიდა.

BBC-ის ინფორმაციით, Asos-ი დამატებით 30 მლნ ფუნტს გადაიხდის პროდუქციაში, თუმცა მაღაზიებს არ შეიძენს. გარიგება ოფიციალურად 4 თებერვალს შევა ძალაში.

”ბრენდების შეძენა საინტერესოა Asos-ისა და ჩვენი მომხმარებლებისთვის, რაც ხელს შეუწყობს ჩვენი მრავალპროფილური პლატფორმის სტრატეგიის დაჩქარებას. ჩვენი მფლობელობით, მათ კიდევ უფრო განვავითარებთ, დიზაინის, მარკეტინგის, ტექნოლოგიისა და ლოგისტიკური ექსპერტიზის გამოყენებით და მჭიდრო თანამშრომლობით დიდ სტრატეგიულ საცალო პარტნიორებთან, დიდ ბრიტანეთსა და მთელ მსოფილოში,“ – აღნიშნა კომპანიის აღმასრულებელმა დირექტორმა ნიკ ბეიტონმა.

გარიგებას ადასტურებენ Arcadia-ს ადმინისტრაციაშიც და განმარტავენ, რომ 300-მდე ადამიანი, რომლებიც ბრენდებში გაყიდვებისა და დიზაინის მიმართულებით მუშაობდნენ, Asos-ში გადადიან. უცნობია რა ელით იმ ათასობით ადამიანს, რომლებიც Topshop, Topman, Miss Selfridge და HIIT–ის მაღაზიათა ქსელში მუშაობდნენ. მთლიანობაში ეჭქვეშ 13,000 სამუშაო ადგილი დგას.

Asos-ს პანდემის პერიოდში გაყიდვების საკმაოდ მაღალი მაჩვენებლი ჰქონდა და უკვე შეძენილი ბრენდების ერთ-ერთი მსხვილი მოვაჭრეა.

ფოტო: PA MEDIA