"ქვეყანამ ფარმაცევტული პროდუქციის შესახებ ახალი კანონი უნდა მიიღოს"
აუცილებელია, საქართველოს მიიღოს ახალი კანონი ფარმაცევტული პროდუქციის შესახებ, რადგან დღეს მოქმედი კანონი, რომელიც 2009 წელსაა მიღებული, არ შეესაბამება თანამედროვე სტანდარტებს.
ამის შესახებ ფარმაცევტული კომპანიების წარმომადგენელთა ასოციაციის ხელმძღვანელმა ირაკლი მარგველაშვილმა პირველი არხის გადაცემა „ბიზნესპარტნიორში“ განაცხადა. მისი თქმით, სექტორში ბოლო ერთ წელიწადში ძალიან ბევრი რეფორმა განხორციელდა, რაც დროის ამ მონაკვეთისთვის რევოლუციური ცვლილებებია. თუმცა ეს არ უნდა მიმდინარეობდეს ფრაგმენტულად. მისი თქმით, მომდევნო ნაბიჯი უნდა იყოს გაწერილი და ეს უნდა იყოს მედიკამენტების ჭარბი მოხმარების დარეგულირება, რადგან ქვეყანაში წამლებზე გაწეული დანახარჯების 25% არის არასაჭირო. ირაკლი მარგველაშვილი ამბობს, რომ შემდეგი ნაბიჯი მიმართული უნდა იყოს მკურნალობის ხარისხისა და ეფექტიანობის გაზრდაზე, რადგან გვჭირდება არა ბევრი, არამედ სწორად დანიშნული მედიკამენტი.
„როცა ჩვენ ვსაუბრობთ სხვადასხვა სეგმენტზე – რეგისტრაციაზე, პარალელურ იმპორტზე და ა.შ. ესაა რეფორმების მხოლოდ ნაწილი. 80 ფარმაცევტული ქარხნიდან დარჩა 4. ადამიანი, რომელიც ჩახედული არ არის საკითხში, იტყვის, რომ ეს ცუდია, მაგრამ ესაა სწორი პროცესი, რადგან წინა საუკუნის ტექნოლოგიებით წინ ვერ წავალთ და უნდა განვვითარდეთ. ჩვენ გვინდა საერთაშორისო სტანდარტზე გადასვლა და ამას დიდი რესურსები და ფინანსები სჭირდება, სხვანაირად არ გამოვა. უნდა იყოს ხარისხობრივი კონკურენცია. ანუ საქართველოში უნდა იყოს მხოლოდ ის მედიკამენტები, რომელთა ხარისხი საერთაშორისოდაა აპრობირებული. რეფორმები მოქცეული უნდა იყოს ლოგიკურ გადაბმულ ჯაჭვში, რომ ამ ყველაფერმა იმუშაოს, უნდა იყოს მთლიანი კანონი. ახლა ჩვენ გვაქვს 2009 წლის კანონი, რომელიც არ შეესაბამება საერთაშორისო სტანდარტებს,“ – განაცხადა მარგველაშვილმა.
