ვაჭრობა ახლებურად - რამდენით და ვინ ვაჭრობს Bmatch პლატფრომაზე

ეროვნული ბანკის ინფორმაციით, Bmatch-ზე ამ დროისთვის ეროვნული ბანკი, 15 კომერციული ბანკი, 5 მიკროსაფინანსო ორგანიზაცია, ერთი ქართული არასაბანკო კომპანია "მაგთი" და ერთი საერთაშორისო საინვესტიციო ფონდი მონაწილეობს.

„ეს შედარებით ახალი პლატფორმაა და მისი არსი არის ის, რომ გარიგებები იდება სტანდარტული პირობებით. მნიშვნელოვანია, რომ გარიგება იდება ავტომატურად მყიდველისა და გამყიდველის კურსის თანხვედრის შემთხვევაში. რაც უზრუნველყოფს გარიგების დადებას კონკრეტულ მომენტში არსებული საუკეთესო და ოპტიმალური კურსით. ეს არის ის მახასიათებლები, რომლებმაც მყიდველებს და გამყიდველებს შორის ყველაზე სარფიანი გარიგებები უნდა უზრუნველყონ,“ - აღნიშნა კობა გვენეტაძემ.

ეროვნული ბანკის პრეზიდენტის ინფორმაციით, 2020 წლის მარტიდან 2021 წლის 31 იანვრის ჩათვლით, Bmatch-ზე დაიდო 3 873 გარიგება და საერთო მოცულობამ 514 მლნ დოლარი შეადგინა. აქედან არასაბანკო მონაწილეებმა დადეს 1 348 გარიგება საერთო მოცულობით 168 მლნ დოლარი, რაც მთლიანი ბრუნვის 33%-ს შეადგენს.

„მინდა განსაკუთრებით მსხვილ კომპანიებს მოვუწოდო, რომ ჩაერთონ ამ პლატფორმაზე. ჩვენ რამდენიმე კომპანიამ უკვე მოგვმართა და ეს პროცესი გრძელდება,“ - განაცხადა კობა გვენეტაძემ.