სავალუტო სესხის გაცემა მიკრობანკსაც შეეძლება თუ არა მომავალ კვირას გაირკვევა

300 000 ლარამდე სესხები უცხოურ ვალუტაში, რამდენად ხელმისაწვდომი იქნება მიკრობანკის ჰეჯირებული კლიენტებისთვის, და რა შესწორებები შევა მიკრობანკის შესახებ კანონში, - ამ და სხვა საკითხებზე სებ-ში კონსულტაციები მომავალ კვირას გაიმართება. 

მიკროსაფინანსო ასოციაციის თავმჯდომარის ნინო დევდარიანის განცხადებით, შესაძლო ცვლილებებზე სებ-ში შეხვედრის შემდეგ გახდება ცნობილი. 

მისი თქმით, ბაზარს მოლოდინი აქვს, რომ გაცხადებული ცვლილებები, რომელიც  სებ-ის საზადამხედველო სუბექტებს (ბანკი, მისო, სგს...) ეხება, მიკრობანკებზეც გავრცელდება.

სებ-ის ფინანსური სტაბილურობის დეპარტამენტის უფროსის დავით უტიაშვილის განცხადებით, ყველა ვალდებულება გაწერილი იქნება წესში, რომელსაც სებ-ი 1-2 კვირაში გამოაქვეყნებს. მისი ინფორმაციით, მიკრობანკის ლიცენზიის მიღებაზე ზედამხედველისთვის ჯერ არცერთ სუბიექტს მიუმართავს. წესის ამოქმედებამდე  დაზუსტებით მხოლოდ იმის თქმაა შესაძლებელი, რომ ჰეჯირებულ კლიენტებზე 300 000 ლარამდე სავალუტო სესხის გაცემა ამჟამად მოქმედ ყველა სუბიექტს შეეძლება.

ამ დრომდე გამოცემული სამართლებრივი აქტებით, მიკრობანკს, რომელსაც კანონი, სესხის ზედა, 1 მილიონიან ზღვარს უწესებს, სავალუტო დაკრედიტება, ნებისმიერი მოცულობით, როგორც ჰეჯირებული ასევე არაჰეჯირებული კლიენტისთვის ეზღუდება.